[A:219a]la chos skad byas pas mar pa rgyal/ /pha rgyud gsang ba 'dus pa zhes bya ba rlung sbar 'dzin du bya ba de dgos zer nas de la lan 'debs rgyu ma byung / log nas bla ma la zhus pas/ nub tu la kShe tra'i dgon pa na paNDYi ta ye shes snying po bya ba pha rgyud kyi bdag po zhig bzhugs der song gsung / phyin pa'i lam du chu mi zan dug gi chu brgal na sha lpags zul bshus 'gro ba zhig yod pa la de'i 'gram na yul chung zhig 'dug pa'i mi la rngan pa byin pas/ nags gseb nas shing lo zhig blangs/ de btags te lus la byugs nas da brgal bas chog zer/ brgal bas sbrul bzhin shun pa brjes/ gzhan skyon ma byung / der ye shes snying po dang mjal gsang ba 'dus pa 'phags lugs rgyud 'grel pa dbang man ngag dang bcas pa zhus te/ chu mi zan dug gi chu la brgal/ /lus dug sbrul bzhin du shun pa brjes/ /srog dor bar phangs so chos la bsams/ /nub la kShe tra yi dgon pa ru/ /dpal ye shes snying po'i zhabs la gtugs/ /pha rgyud gsang ba 'dus pa nyan/ /sgyu lus 'od gsal gyi gdam ngag thob/ /lam rim pa lnga yi don la bslabs/ /de nas tshur log bla ma'i drung du kha che paNDYi ta chen po A ka ra siddhi byon nas gsang 'dus zhu ba dang 'grig gsol ba btab pas dus la bab pa yin gsungs gnang bas bshad pa la khyad med/ man ngag zab pa tsam byung bas/ bla ma rang gi mkhyen bzhin du bdag de nas phar gtong ba zhus pas/ khong la gsang 'dus kyi bka' babs pa yin gsung / der gnyos dang phrad chos skad byas pas rgyal/ khong nas ma rgyud mahA ma yA bya ba dgos zer/ bla ma la zhus pas/ bla ma'i zhal nas lho dug mtsho'i gling na paNDYi ta zhi ba bzang po bya ba ma rgyud kyi bdag po zhig bzhugs/ der song gsungs lam 'jigs pa che bas bar chad mi 'byung ba'i byin brlabs mdzad de byon pas ha la pa Ta dug mtsho khol ba'i gling gi do ri la btsal bas nyi ma'i dgung la smag rum mun pa 'thibs/ dmod btsugs nas gsol ba btab pas mun pa sangs/ rje btsun dang mjal/ der pho nya dang phrad dam gsungs/ stag gzig 'dra las gzhan su dang yang ma phrad zhus pas/ de ka yin mod gsung / der tshogs dang gser gyi maNDYal phul/ mahA ma yA'i rgyud dbang sgrub thabs rnal 'byor gsum la sogs pa'i man ngag kun gnang ste/ lho dug mtsho khol ma'i gling du phyin/ /dus nyi ma'i