[A:218a]dgos zhus pas zhal gyis bzhes/ thog mar dgyes rdor gyi dbang gnang bar tshugs/ der bla mas dgyes rdor lha dgu'i dkyil 'khor mngon sum du sprul nas lo tsA ba khyod dbang lha la zhu'am nga la zhu gsungs/ lha la dbang dngos su thob na ya mtshan snyam dbang lha la zhu/ rgyud gdam ngag bla ma rang la zhu zhus pas/ de thugs kar bsdus nas/ byin rlabs kyi rtsa ba bla ma yin pa la/ khyod kyis bla ma las yi dam lhag snyam 'dems pas khyed la mi brgyud kyi phan mi thogs/ chos brgyud chu bo'i gzhung lta bu 'byung gsungs lung bstan/ dbang dus der mthong lam gyi rtogs pa rgyud la 'khrungs/ theg chen gyi sa dang po non te/ ma skal ba bzang mos rjes gnang ba/ /byin rlabs kyi chu rgyun ma chad pas/ /dbang bzhi'i don la ngo sprod mdzad/ /zag pa med pa'i ting nge 'dzin skyes/ /zhag bdun bar du brtan pa thob/ /srog rtsol 'pho ba nyi zla gnyis/ /g.yo med nam mkha'i khyim du bcug /rang byung lhan cig skyes pa'i nyams/ /bde gsal mi rtog khong nas shar/ /bag chags gnyis kyi 'khrul pa de/ /'od gsal lam gyi ngo bor rtogs/ /yid kyi g.yo ba gzung 'dzin gnyis/ /spros bral chos kyi dbyings su bstim/ /phyi snang ba sgyu ma'i 'khrul 'khor 'di/ /skye med bde ba chen por rtogs/ /nang 'dzin pa yid kyi rnam shes 'di/ /sngar 'dris mdza' bo phrad pa bzhin/ /sems nyid rang ngo rang gis shes/ /lkugs pas rmi lam rmis pa bzhin/ /brjod du med pa'i don cig rtogs/ /gzhon nus bde ba myong ba bzhin/ /smra ru med pa'i nyams shig shar/ /dang / ljongs me tog rgyas pa'i dgon pa der/ /dbang bzhi'i chu bo rdzogs par bskur/ /zhes pas so/ /de nas dbus dang kha cher byon/ khyad par puShpa ha rir bzhugs nas/ dgyes rdor rgyud gsum gyi bshad pa/ dbang lung man ngag bsre 'pho gnad kyi mtshams sbyor/ bka' srung gur dud sol dang bcas pa gnang ste/ gnas ngo mtshar mkha' 'gros lung bstan pa/ /sa byang phyogs kha che'i yul du phyin/ /dpal puShpa ha ri'i dgon pa der/ /sgo srung gi nA ro paN chen la/ /rgyud zab mo dgyes pa'i rdo rje zhus/ /bsre 'pho gnad kyi mtshams sbyor thob/ /khyad par gtum mo las rgya zhus/ /chos skyong dud sol lha mo thob/ /der bar zhig la gnyos dang phrad/ /dgyes rdor