[A:216a]stod 'gyur/ rgya gar phyag na 'brog jo sras kyis spyan drangs/ gtsang gi chu sgor bzhugs nas lha rje gtsang shod pa sogs bod ston chen po sum cu la gdams pa phyi ma u su te bal po skye med du grags pa la/ slob ma sgom ka ba bzhi/ gdung drug yor po ba'i bu gsum/ dmag pa sgang pa la sogs pa'o/ /phyi 'gyur mnga' ris pa nag po sher dang skyis rgya gar du byon nas phyag na sku bgres khar thug phyir log bod du dar ba rnams so/ /de ltar nyan bshad yod pa rags rim ste/ gzhan lo tsA ba dang paNDYi ta du mas bsgyur bshad mdzad pa dpag tu ma mchis so/ /mdo sde lung rgyun rnams gro lung pa chen pos bskul nas steng pa lo tsA bas rgya gar nas btsal ba dang / phyis 'phags pa rin po ches thugs rtsol mdzad pas bka' 'gyur ro cog gi lung rgyun yid ches pa 'di byung ngo // // ! gangs can 'dir rdo rje theg pa'i bshad pa dang sgrub pa thams cad kyi sgo nas bstan pa'i bdag por 'jog 'os pa ni rje btsun mar pa lho brag pa ste/ 'khrungs yul lho brag chu khyer/ gdung mar pa/ yab dbang phyug 'od zer dang / yum skal ldan skyid gnyis la lcam sring lnga yod pa'i lnga tshigs pa/ gzhon nu nas bri klog mkhas par mkhyen/ shin tu gdug rtsub che bas shed bye re nas yab yum gyis ka ca mang du bskur te dgung lo bcu gnyis lon pa na chos la brdzangs pa ste/ lo bcu gnyis lon nas chos dang phrad/ de sngon sbyangs kyi bag chags sad pa 'dra/ der bla ma su grags che ba rtsad bcad pas/ de'i dus 'brog mi lo tsA ba skad che bar 'dug nas/ mang mkhar du byon myu gu lung gi dgon par mjal/ phyag rten kyang che bar byas/ chos sgor zhugs sgra skad lo tsA mkhas pa'i tshad du bslabs te/ dpal myu gu lung gi dgon par phyin/ /sgra bsgyur 'brog mi lo tsA la/ /sgra thad klog skad kyi yig tshad bslabs/ /khong bka' drin mi chung che bar 'khums/ /der gsang sngags kyi chos 'dod kyang yon che la bka' dog pas ma thob ste/ dpal myu gu lung gi dgon pa ru/ /gsang sngags chos kyi mu ge la/ /sems yi dwags byed cing lo gsum bsdad/ /de nas rgya gar du 'gro ba'i spobs pa skyes te/ yul nas ka ca blangs gser du bsgyur/ sngar gyi ka ca rnams stag ris su gser du btsongs/ der zla bo ma 'byor bar zhag 'ga' bsdad/ sgyer phu'i klog skya chen po de stag sde mig mang su