[A:214a]gtsang ston/ shes gnyen ston sogs las mched pa la pho spyod ces grags so/ /de lta bu'i spyod yul pa rnams zhi byed du rtogs kyang lugs tha dad du bye'o// // ! dpal nA ro pa'i lcam ni gu ma'i lugs bod du byung ba ni/ yul snye mor mang su rus khyung po/ btsas ma thag tu rgya gar gyi grub thob a mo gha badzwa gyis lung bstan pa/ gzhon nu la klog dang bon/ rdzogs chen sems sde bslabs/ stod lung sho ma rar kong ni ru pa'i chos ma lus pa gsan/ de nas gser mang po bsnams nas bal por paNDYi ta su ma ti las lo tsA bslabs/ kri yog gi chos gsan/ a tu lya badzwa gyis grogs mdzad/ rdo rje gdan pa mjal/ dge tshul mdzad/ de nas shrI bha dra sa dznyyA na/ bai ro tsa na/ kha che dgon pa ba/ mai tri pa'i slob ma zhing gi rdo rje/ mi mnyam rdo rje/ rin chen rdo rje gsum/ de wi ko Ta DA ki ma ka na shrI/ bram ze ratna pha la rnams la gsang sngags kyi chos mang du gsan/ bod du byon/ gu lang gi gser kha rdol ba dang thug gser mang po byung bas slar bal por byon/ pham thing pa la bde mchog nA lendrar nA ro pa'i slob ma dA chen po/ mai tri pa'i slob ma na treng ka ba sogs mang du bsten/ lhag par mai tri pa dang mjal/ de'i tshe rdo rje 'chang dngos la thug pa su yod dris pas/ nA ro pa'i lcam ni gu ma zhes bya ba yod/ de 'ja' lus brnyes pas su rung gis mi mthong / so sa gling gi dur khrod du mkha' 'gro ma'i tshogs dpon la 'byon pas sems dag na der mthong srid zer/ so sa gling du byon/ na mo buddhA ya'i gsol ba btab pas ta la bdun srid tsam gyi nam mkha' la mkha' 'gro ma sku mdog smug nag rus pas brgyan pa/ phyag na kha TsAM ga dang thod pa bsnams pa gcig dang du ma la sogs pa'i gzugs ston pa zhig mthong nas/ ni gu ma yin par nges te phyag dang skor ba byas/ yang dag pa'i gdams pa zhu 'tshal zhus pas/ nga ni sha za'i DA ki yin gsung / yang btud de zhus pas/ gsang sngags kyi gdams pa zhu na gser dgos/ srang lnga brgya phul bas nags su gtor/ sha za'i mkha' 'gro ma yin nam snyam du the tshom zos/ spyan nam mkha' la gzigs nas mkha' 'gro ma mang po 'dus nas dkyil 'khor sprul/ der sgyu lus rmi lam gyi dbang bskur gnang / mkha' 'gro mas gser gyi ri bo'i khar bzhag der rmi lam du chos drug tshar gcig