[A:206a]'brog sdom de la ngo tsha bar yod gsungs nas 'bad pa chen po mdzad/ khong la bal po phan chad na paNDYi ta'i bla ma bdun cu dang / mkha' 'gro'i bla ma gnyis rnams yod/ de dag las gtso bo ni bhangga la'i mngon shes can/ za hor gyi mkhas pa btsun mo can/ kong ka na'i rgyal bu sprin gyi shugs can/ rdo rje gdan gyi nag po dam tshig rdo rje/ jo bo rje/ kha che grib brtan gyi mkhas pa tsandra rA hU la/ rgyal po'i khab kyi zhi ba bzang po/ bal po thugs rje chen po/ bal po rdzong gi na ba ku Ti pa/ nA ro pa'i slob ma kha che dznyyA nA kA ra rnams so zer/ ngor rje/ klu byang / des tilli nA ro/ des ku sa li che ba/ des ku sa li chung ba/ des gser gling pa/ des piNDYo pa/ bsod snyoms pa dang / mngon shes can dang / btsun mo can dang / dznyyA na A ka ra bzhi la bshad gsungs/ de bzhin chag chos rje dpal pa'i spyi rnam du'ang bgrangs so/ /lo tsA ba des gsang ba 'dus pa rtsa 'grel/ dgyes rdor rgyud gsum 'grel pa/ bde mchog rgyud 'grel pa dang bcas pa/ rdo rje gdan bzhi bshad pa dang bcas pa/ ma hA ma yA sogs rgyud mang po 'grel pa dang bcas pa bsgyur/ mkhyen pa rgya chen po dang ldan pas mang du bshad/ slob ma'i mchog mang ra sengge rgyal mtshan/ brdog ge sa ra/ ngab mi byang chub rgyal mtshan/ lho pa rdo rje snying po/ gnyal pa mgar chos kyi rdo rje/ dbus pa sna drug de las deng sang gi bar du bshad pa'i rgyun snang ste/ bu ston mar 'gos chu bo gnyis 'gril du bzhed la/ de nas brgyud pa tsong kha pa chen po bshad pa 'gos gtso bor mdzad pas/ da lta dge ldan pa rnams bshad pa 'gos kho na las byung ba 'dra zhig gleng ngo / /mar 'gos gnyis kas ye shes zhabs lugs kyang bshad/ gzhan 'dus pa bsgyur mkhan gnyos 'byung po/ phyag lo chos rje dpal sogs mang ngo / /gshin rje gshed skor rnams ni snye nam snang yul du 'khrungs/ byis pa'i dus na lha mo re ma tis phu dung nang du bcug zla ba gnyis su rgyal khams bskor zhing / de nas ma la gtad/ rab tu byung zhing bsnyen par rdzogs/ bal yul du byon/ bal po thugs rje chen po/ 'ba' ro phyag rdum sogs bsten/ nA ro pa nas pra dznyyA rakShi ta/ des bal po thugs rje chen po la gsungs/ de la rwa los legs par gsan zhing mang du mkhyen pa na/ bde mchog rtsa rgyud/ sampu Ta/ rdo rje 'jigs byed