[A:19a]zhugs nas/ slar bsam gtan bzhi la zhugs te rab mtha' las mya ngan las 'das so/ /de ma thag sa g.yos/ skar mda' ltung / phyogs tshig lha'i rol mo'i sgra bsgrags/ 'od srung chen pos de mthong nas ston pa mya ngan las 'das par shes nas dge 'dun rnams myur du sku gdung ma nyams pa la blta ba'i phyir rings par 'gro'o zhes bskul lo/ /de'i tshe gyad rnams kyis gdung 'khor los sgyur ba ltar byas te zhugs la zhen par 'dod kyang me ma 'bar bas/ ma 'gags pas 'od srung ma sleb pa yin par shes te smras pa dang / 'od srung slebs te sgrom phye ras dang shing bal bsal te sku ma nyams pa la phyag byas so/ /de nas kun shes ko'u di nya/ skul byed/ 'od srung stobs bcu pa/ 'od srung chen po bzhis shing bal gyi 'dab ma gzhan dang ras zung lnga brgya gzhan gyis kyang dkris te lcags kyi sgrom bur bcug 'bru mar gyis bkang / dri zhim pa'i shing thams cad spungs pas me rang 'bar du gyur te/ kun dga' bos/ rnam par 'dren pa rin chen sku mnga' ba/ /rdzu 'phrul chen pos tshangs pa'i 'jig rten gshegs/ /sangs rgyas sku la ras zung lnga brgya dang / /chos gos stong snyed kun tu dkris gyur pa/ /nyid kyi gzi brjid kyis ni sku gdung dang / /shin tu dkris pa rab tu tshig par 'gyur/ /de la chos gos gnyis ni ma tshig pa/ /nang rim dang ni phyi rim 'di rnam gnyis/ /zhes dang / spyan ldan sku gdung bre bo brgyad dag las/ /bdun ni 'dzam bu gling pa'i mchod par thob/ /skyes bu mchog de'i bre bo gang zhig ni/ /grong khyer sgra sgrog klu yi rgyal pos mchod/ /skyes mchog de yis mche ba bzhi dag las/ /mche ba gcig ni rtsa gsum 'jig rten mchod/ /gnyis pa tshig 'dzin grong khyer yid 'ong na/ /gsum pa ka ling rgyal po'i yul na ste/ /skyes mchog de'i mche ba bzhi pa ni/ /grong khyer sgra sgrog klu yi rgyal pos mchod/ /ces gsungs so/ /bye brag tu bshad pa las/ chos 'khor gnas dang yangs pa can/ /sa dkar can dang lha yi gnas/ /byin pa gsod dang kau shambi/ /'brog dang mchod rten ri dang ni/ /'od ma'i grong dang sgrar bcas dang / /ser skya'i gnas kyi grong khyer du/ /'di rnams su ni thub pa yi/ /skyes mchog lo re lo re bzhugs/ /