[A:17a]dkyil 'khor ma bsdus par bzhag pas de gang gis mthong ba thams cad grol lo/ /de la lha chen bzhi phrag dog skyes nas dkyil 'khor gyi steng du rin po che sna tshogs pa las lha'i bzo bo bi shwa karma bzor bcug nas mchod rten brtsigs nas de la sgo bzhag go /de nas gang gis mthong ba rnams kyang grol lo/ /de yang gsang nas bzhag pa chos bzang sprin gyi yang rdzong zhes bya'o/ /de la da lta'ang skor ba zhag bdun gyi bar du byas na dngos grub thob bo/ /de la sngon lha chen bzhi la dbang bskur ba'i rtags su mchod rten gyi phyogs bzhi na rgyang grags tsam du shar du tshangs pa/ lhor dbang phyug nub tu khyab 'jug byang du gzhon nu gdong drug dang bzhi lha'i bzo bo bi shwa karma la bzhengs su bcug pa la da lta mu stegs rnams mchod pa chen po byed do zhes dang / yul de'ang sngon rgyal po gser mdog gi dus rang sangs rgyas kyis 'bras so ba'i char phab pas de skad grags pa yin gsung ngo / /'di 'thad pa bzang ste/ dri med 'od las/ de nas chos kyi 'khor lo bskor zhing theg pa gsum bstan par mdzad nas zla ba bcu gnyis pa nag pa'i nya la shrI dha nya ka Ta kar chos dbyings gsung gi dbang phyug gi dkyil 'khor cha bcu drug gis rnam par phye ba'i mtshan nyid can dang / de'i steng du dpal ldan rgyu skar gyi dkyil 'khor cha bcu drug gi rnam par dbye ba can dang po'i sangs rgyas rnam par spros so zhes gsungs/ rgyu skar gyi dkyil 'khor ces pa'ang mchod rten gyi phyogs bzhir ka ba drug drug zur la bzhi yod pas de'i dbang du mdzad nas tha snyad de skad btags pa yin la/ rgyu skar gyi dkyil 'khor yang dus de nyid du spros par bshad pas so/ /zhu ba po'ang / de las sa bcu'i dbang phyug phyag na rdo rje yang shaM bha la'i yul ka la pa'i grong du nyi ma'i 'od kyi lha mo rnam par rgyal ma'i mngal nas 'khrungs pa zla ba bzang po zhes dang / yang phyag na rdo rje'i sprul pa'i sku zla ba bzang po de yis sems can thams cad kyi 'jig rten dang 'jig rten las 'das pa'i dngos grub sgrub pa'i don du de bzhin gshegs pa la gsol ba btab bo/ /de bzhin gshegs pas kyang chu bo si tA'i byang phyogs sham bha la la sogs pa yul rnams su grong bye ba phrag dgu bcu rtsa drug na gnas pa rnams kyi sems rnam par dag pa skal ba dang ldan pa nyid du gnas par gzigs nas rdo rje'i tshig kha ma phye ba med pa/ rdo rje'i tshig rab tu gsal bas phyed pa mchog gi dang po'i sangs rgyas stong phrag bcu