[A:15a]las gsungs pa'i phyi ma'ang 'dir gtogs la/ rgya bod kyi mkhas pa mang pos de'i phyi ma sems tsam du 'grel yang 'thad par ma mthong ste/ de dang phyir mi ldog pa'i 'khor lo'i mdor gsungs pa'i bde gshegs snying po sbyang tshul gsum bshad pa'i gsum pa 'grig don dbu ma pas lta ba kun zlog ces bzhag pa'i skabs/ de'i dbang las 'di'i gdul bya la theg pa thams cad la zhugs pa zhes gsungs/ de'i don theg pa gang du zhugs kyang mthar 'dir zhugs dgos pa dgongs pa yin te/ der ma zhugs na sangs rgya ba mi srid pas sems can thams cad sangs rgya ba'i bshad pa'ang don med par 'gyur ba yin no/ /'khor lo gnyis po bskor ba la dus dang po lo bdun/ bar pa lo nyer bdun dang so gcig zer ba rigs pa ma yin te/ de'i rigs su gtogs pa dag thog ma dang mya ngan las 'da' kha'i bar du gsungs pas so/ /chos kyi 'khor lo gsum pa ni rdo rje theg pa ste/ u rgyan la sogs pa'i yul dus sna tshogs par tho re long nge gsungs pa yod kyang / gsang sngags thams cad dus gcig tu bskor ba ni 'bras spungs dpal ldan rgyu skar gyi dkyil 'khor te/ 'di'i dus kyang sangs rgyas pa'i phyi lor 'dod pa ni mdo sde gdam ngag 'bogs pa'i rgyal po las/ 'dren pa'i theg pa gsum po dag /bcom ldan nges par gsungs lags na/ /rgyu 'bras lhun grub tu spyod cing / /sangs rgyas gzhan nas mi 'tshol ba'i/ /nges pa'i theg pa cis ma gsungs/ /zhes 'jam dpal gyis zhus pa'i lan du/ rgyu la mos pa rgyu chos kyi/ /'khor lo rab tu bskor byas nas/ /rdo rje theg pa'i nye lam zhig /ma 'ongs dus na 'byung bar 'gyur/ /zhes gsungs pa dang 'gal bas nor ba'o/ /der dus kyi 'khor lo gcig pu ma yin pa gsang sngags thams cad bstan par dus 'khor rtsa rgyud las/ ston pas bya rgod phung po ru/ /shes rab pha rol phyin tshul bzhin/ /chos bstan dpal ldan 'bras spungs su/ /de bzhin gsang sngags tshul rab gsungs/ /zhes dang / de'i don slob dpon nyi ma dpal ye shes kyis mdzad pa'i mtshan brjod kyi 'grel bar/ 'dir nges par dpal ldan 'bras spungs rgyal ba'i mchod rten chen por/ sangs rgyas bcom ldan 'das shAkya sengge zhes bya ba la rgyud sna tshogs nyan par 'dod pa rnams kyi gsol ba btab pas/ dpyid zla 'bring po'i nya la chos kyi dbyings gsung gi dbang phyug gi dkyil 'khor dang / de'i steng du dpal ldan rgyu skar gyi dkyil 'khor