[A:14a]'khor lnga brgya dang bcas rab tu byung / de nas ma ga dhar gshegs nas bzang sde'i tshogs drug cu/ lteng rgyas su gshegs te 'od srung ral pa can spun gsum 'khor stong dang bcas pa/ shA ri'i bu dang mo'u 'gal gyi bu 'khor lnga brgya dang bcas pa bsnyen par rdzogs te dgra bcom thob/ mchog zung 'khor lnga brgya dang bcas pa'i phyed ljongs rgyur btang / phyed dang 'od srung ral pa can 'khor bcas tshogs pa stong nyis brgya lnga bcu la 'dus pa dang po zhes grags so/ /chos kyi 'khor lo des ni skyes bu chung ngu'i lam zhar la bstan cing skyes bu 'bring gi lam gtso bor bstan to/ /de la bden pa'i de nyid kyi tshul zhes kyang bya'o/ /khyim bdag mgon med zas sbyin gyis rgyal byed tshal phul lo/ /lo drug pa la yab sras mjal/ lo bcu gsum gyi bar du bstan pa la skyon med cing / so sor thar pa'i mdo'ang bsdus pa 'don no/ /gnas rgyal po'i khab bya rgod phung po'i ri la 'khor rnam pa bzhi dang / khyad par byang chub sems dpa'i tshogs chen po dang thabs cig tu bcom ldan 'das nyid kyis gdan sengge'i khri bshams nas chos kyi 'khor lo'i phyag rgya bcing ba sngon du btang nas skyil mo krung bcas/ sku drang por bsrangs/ dran pa sngon du bzhag par mdzad nas cho 'phrul rnam pa gsum gyis thog ma dang / bar dang / mtha' mar dge ba la sogs pa dang ldan pa'i shes rab kyi pha rol tu phyin pa rjes su ston par mdzad pa de'ang tshig lhur len pa rgyas pa la dga' ba'i sems can rjes su gzung ba'i don du 'phags pa stong phrag brgya pa dang / spros te go ba bar ma la dga' ba rnams la don thams cad bsdus nas stong phrag nyi shu lnga pa dang / khri brgyad stong pa dang / shes rab khri pa/ 'go smos pas go ba bsdus pa la dga' ba la de'i yang don thams cad bsdus nas brgyad stong pa/ tshigs su bcad pa la zhen pa rnams kyi ched du 'bum gyi don thams cad bsdus nas yon tan rin po che sdud pa gsungs par sengge bzang po 'chad la/ sngon gyi bod ston dag rgyas pa la bye ba phrag brgya pa/ 'bum phrag brgya pa zhes kyang gsungs so/ /de bskor ba'i tshe lha'i bu dag gis smras pa/ kye ma a la la 'dzam bu'i gling du chos kyi 'khor lo gnyis pa bskor ba mthong ngo zhes ched du brjod pas so/ /rgyu'i theg pa thams cad der 'du bas 'di ni skyes bu chen po'i lam pha rol tu phyin pa'i tshul zhes grags so/ /dus kyang gnas brtan sde pa'i gzhung dang bstun na/ bcom ldan 'das sangs rgyas nas lo bcu drug pa la'o/ /chos kyi 'khor lo gsum par don zab dgongs pa nges par 'grel ba