[A:102a]pa'i lam gyi snying po sgrub pa'i tshe/ bar du gcod pa'i bgegs byung ba rdo rje phur pas bsgral te phyag rgya chen po mchog gi dngos grub thob par gyur pas rdo rje thod 'phreng rtsal zhes bya'o/ /de nas bod yul du byon te bod kyi 'dre srin gdug pa can gnod sbyin gtum po ma rungs pa'i rigs su gnas pa thams cad phyag rgya gnyan pos zil 'og tu mnan/ rang rang gi srog mdongs gsol du phul ba bzhes/ bka' 'bangs bgyid par rtsis la phab/ sangs rgyas kyi bstan pa skyong bar chad byas te dpal gyi bsam yas bzhengs rab tu gnas pa mdzad pas bod khams bde ba la bkod/ bsam yas 'chims phu'i brag dmar ki'u tshang du sgrub pa chen po bka' brgyad kyi dkyil 'khor zhal phye/ las can gyi rgyal po rje 'bangs smin par mdzad/ gsang sngags 'bras bu'i theg pa shin tu gsang dam pa'i tshul gyis bstan/ mtsho rgyal gzungs mar bsten/ stag tshang sengge'i bsam 'grub kyi phug tu gdug pa'i mu stegs bdud dang dam sri btul/ gnas chen gangs brag rnams su gter chen du ma sbas te ma 'ongs pa'i sems can gyis spyod pa'i skabs phye la rdo rje gro lod rtsal zhes bya'o/ /bod kyi gangs chen bzhi la sgrub pa mdzad pa dang / brag phug chen po brgyad la yang dben mdzad pa dang / phyogs bzhi'i brag la zhabs rjes/ yongs su grags pa'i mtsho chen bzhi la phyag rjes/ lho phyogs mon kha'i brag la sku rjes/ sku tshab rigs lnga bod kyi don la bzhag ste/ zhi ba dang / rgyas pa dang / dbang dang / drag po rnam pa bzhi yis nyon mongs pa 'dul dka' ba'i sems can thams cad thabs kyis 'dul bar mdzad de/ mthar mang yul gung thang gi bar du rgyal po 'khor dang bcas pas bskyal te/ nang re dgongs re bod kyi don la 'byon/ /nyi zer 'char sdud mdangs la chibs te 'byon/ /yar ngo'i tshes bcu'i dus na dngos su 'byon/ /zhes zhal gyis bzhes te mthong mi mthong gi bar mkha' la 'phur ba skad mdzad la/ gzhan yid ltar myur ba'i rdzu 'phrul gyi srin yul rnga yab gling du srin po'i rgyal po'i rnam par mdzad de/ gdug pa can gyi kha gnon pa la 'jig rten ji srid gnas