[A:101a]bas 'jig rten gyi ma mo mkha' 'gro thams cad dbang du bsdus pas mtshan shAnta rakshi ta zhes bya'o/ /gzhan yang phyogs bzhi mtshams bzhi'i dur khrod chen po brgyad kun tu tshul de lta bu'i spyod pa bskyangs pas ye shes kyi mkha' 'gro thams cad dang / khyad par bcom ldan 'das rdo rje phag mo'i zhal mthong byin gyis brlabs pas nam mkha'i gza' chen po thams cad bran du 'khol bar nus te rdo rje drag po rtsal zhes bya'o/ /de nas brag dmar bya khyung tshal gyi ke'u tshang du slob dpon chen po pra bha ha ti'i spyan sngar yo ga rnam pa gsum gyi chos la sbyangs/ de nas bshad pa'i lha tshogs thams cad mngon du gyur gzigs te shAkya sengge zhes bya'o/ /gzhan rgya gar yul gyi gnas chen gtsug lag khang du mar byon te phyi mtshan nyid/ nang gsang sngags/ sgra dang tshad ma la sogs pa kun la sbyangs pas mkhas pa blo ldan mchog sred ces bya'o/ /de nas brag phug ma ra ti ka'i gnas su 'chi med tshe bsgrubs pas 'grub ste/ nam mkha' ji srid skye 'chi mi ston par rdo rje'i skur bzhugs pas padma 'byung gnas zhes bya'o/ /de nas za hor gyi rgyal khams rdzu 'phrul gyis btul te dam pa'i chos rgyas par mdzad pas padma sambha wa zhes bya'o/ /u rgyan gyi yul du gshegs pas gshed mas me'i dbus su bsregs pa'i tshe me thams cad mtshor song / de'i dbus su padma'i sdong po byung ba de la slob dpon yab yum bzhugs te/ yum ni za hor rgyal po'i sras mo mandara'o zhes rgyal po indra bhU ti 'bring po 'khor bcas byang chub tu bkod de padma rgyal po zhes bya'o/ /'di las sngar gyi sku med rdo rje slob dpon du gtogs la/ de kha dga' rab rdo rjer 'chad mkhan yang snang bas/ de'ang slob dpon gyi sgyu ma'i gar ro snyam mo/ /de nas rgya gar du byon/ mkha' 'gro bdud 'dul mas byin gyis brlabs/ mu stegs kyi ston pa lnga brgya rtsod pas btul/ ngan sngags kyi bdag po phyag sor gyi rtse las thog 'phangs te bsgral bas 'phags pa sengge sgra sgrog ces bya'o/ /de nas bal yul du byon/ yang le shod kyi brag phug tu yang dag