[A:361]gnang gi na chag phyi pa med par byon/ khyi zan de zad pa dang/ phyag 'khar la mdung bsgor gyi rnam pa mdzad kyin byon nas bzhugs stan la bzhugs ma thag tu/
bla ma dam pas byang chub brnyes pa na//
slob ma'i tshogs la ye shes gzigs pa 'jug//
chos 'brel byas pa don med mi 'gyur bas//
chos thob pa la dga' ba sgo mas cig ang//
zhes lan gcig gsungs nas/ gang blo 'don par mdzad do//
de nas gsung chos ni rten gyi bse ru lta bu'i lam// ces pa'i mdo tshan pa gnyis la bshad pa rgyas pa mdzad/ lha rnams kyis mngon par gtor ba'i me tog 'di dag ni/ bdag gis sngon chad sum cu rtsa gsum pa'i gnas na yang yod par ma mthong ste/ 'di dag ni sprul pa'o zhes gsungs/ 'de'i lhag ma sang nyin nyi ma dron po byung na 'chad do zhes gsungs/ theg pa chen po rgyud bla ma'i chos ni/
de ltar nam mkha'i mtha' klas kyi//
'gro la rtag tu lhun grub par//
thogs med blo ldan de yis ni//
sems can don ni yang dag 'jug//
ces sogs sho lo ka gsum gsungs/ de nas dar cig spyan nam mkha' la gzigs nas hrig ge ba mdzad/ de nas skyil mo krung mdzad bzhin pa'i ngang la/ phyag 'khar sa la gtsugs phyag gnyis kas phyag 'khar la 'jus nas/ 'o bstan pa la bsam pa'i bshad nyan dgos pa yin/ rang re'i dgon pa 'dir yang nyin mo mdo dang/ bstan bcos chen po rnams la nyan bshad mdzad dgos/ khyod khyod rang rang/ khyod ma yin khyod ces ma zer/ mtshan mo lung dang rigs pa'i rnam gzhag 'ur chil le ba gyis/ rnga ma brdung/ dung ma 'bud/ grong ma 'grim/ kho bos lo brgyad cu rtsa gsum lon lon gyi bar