[A:325]skabs der thugs cung zad 'gyur te/ snying po'i rdza'i ri khrid du brtag pa mdzad pas/ mtshan lam du/ yul dbus kyi mthil zhig na/ me tog khra ding nge ba yod pa'i dgon pa/ phyogs mtha' dag nags tshal mtshar du dngar bas bskor zhing/ de'i phyi rol na ne'u sing sngon pos bskor ba zhig snang/ rgya'i bandhe gcig na re/ me tog ldum ra'i dgon pa ni 'di yin te/ 'dir 'dug shig gzhan de ni de ma yin no zhes zer ba rmis/ de nas thugs 'gyur ba yin no zhes yid ches pa'i slob dpon gyi zhal las thos so//
yang dbu ru stod kyi dgon pa/ lo dang bya yul du bzhugs pa'i tshe/ 'bri khung sde bdag dang/ bya yul stong dpon gyis yon gyi bdag po mdzad do//
sngon bslab sbyangs mdzad pa'i dus su gro sa dang/ thang sag dang/ rgyal gyi lha khang rnams su bzhugs pa'i tshe/ yon gyi bdag po ni/ khri dpon rin rgyal dang/ drung a rdor ba gnyis kyis gtso bor mdzad/ phyis chos kyi 'khor lo bskor ba'i tshe ni/ gtso bor mkhar rtse nas drung chen dge slong pa yab sras kyis dgon pa'i sa dang/ bdag rkyen gyi gzhis phul zhing/ gzhan yang sde pa bdun tshan dang/ chos sde chen po so so nas bdag rkyen legs par bsgrubs te/ chos kyi 'khor lo rgya chen po bskor bar mdzad do//
de dag la 'di skad ces/
yul dbus yul gyi sman ljongs su//
zhabs sen zhabs kyi ri mo ni//
rnam bkra rnam par bris gyur pa'i//
sa de sa chen 'di na dge//
sngon tshe sngon gyi rgyal ba la//
legs tshogs legs skar gyis ma mthong//
dus 'dir dus gsum mkhas pa la//
mi mkhas mi rnams log par blta//
de tshe phur bu'i bla ma ni//
mig stong can des khyod nyid kyi//
yon tan legs bshad lung mig can//
brgya byin gzhu yi thag pa la//