[B:2b]དགོངས་པ་དང་། སྔར་ཀོའུ་ཤཾབྷིར་བསྟན་པ་བསྡུད་ཐེངས་གཅིག་བྱུང་བ་ལྟ་བུ་ཡུལ་ཁྱད་པར་བ་རྣམས་སུ་བསྟན་པ་བསྡུས་པ་སོགས་ལ་དགོངས་པར་གསལ་ལ། ལུང་ཕྲན་ཚེགས་དང་། སངས་རྒྱས་དྲིན་ལན་གསབ་པའི་མདོ་སྟེ། བཅོམ་ལྡན་འདས་ཀྱི་བཀའ་སྩལ་པ། སློབ་དཔོན་འཇམ་དཔལ་གྲགས་པ་དང་། འབུམ་ཊཱིཀ་མཁན་པོ་སྟེ། བསྟན་བཅོས་མཁན་པོ་
[A:4]གཉིས་རྣམས་མཐུན་པར་ལོ་ལྔ་སྟོང་དུ་གནས་པ་ལ་ལྔ་བརྒྱ་པ་ཕྲག་བཅུར་ཕྱེ་ནས། དགྲ་བཅོམ་པ་དང་ཕྱིར་མི་འོང་དང། ཕྱིར་འོང་རྒྱུན་ཞུགས་ཏེ་འབྲས་བུ་ལ་གཙོ་བོར་སྤྱོད་པས་འབྲས་བུའི་དུས་ཀྱི་ཕྲག་གསུམ་དང་། ཤེས་རབ། ཏིང་ངེ་འཛིན། ཚུལ་ཁྲིམས་གསུམ་ལ་སྤྱོད་པས་སྒྲུབ་པའི་གསུམ། མདོ་སྡེ། མངོན་པ། འདུལ་བ་གསུམ་ལ་སྤྱོད་པས་ལུང་གི་གསུམ། ཐ་མ་རྟགས་ཙམ་འཛིན་པ་དང་བཅུར་མཛད་ལ་དུས་འཁོར་ན་དངོས་སུ་མི་གསལ་ཡང་དོན་གྱིས་ཐོབ་པ། ཀླ་ཀློསཉམས་པར་མ་བྱས་ཀྱི་བར་ལ། ཆོས་རྒྱལ་ཤཱཀ་རིགས་དྲུག རིགས་ལྡན་ཉི་ཤུ་རྩ་ལྔ། དྲག་པོ་འཁོར་ལོ་ཅན་ཏེ། སོ་གཉིས་ཀྱིས་ལོ་བརྒྱད་བརྒྱར་ཆོས་བསྟན་པས་སུམ་སྟོང་ཉིས་བརྒྱ། འཁོར་ལོ་ཅན་གྱིས་ཀླ་ཀློ་བཅོམ་ནས། སྟོང་བརྒྱད་བརྒྱ་བསྡོམས་པས་ལྔ་སྟོང་དུ་ངེས་ལ། དེ་གཉིས་ལ་སྔ་དར་ཕྱི་དར་གྱི་ཐ་སྙད་ཀྱང་བྱར་རུང་ངོ་། །དེ་ལས་སྔར་ཇི་ཙམ་འདས་ན་ཡོངས་གྲགས་དང་དུས་འཁོར་ལུགས་གཉིས་མི་མཐུན་ཏེ། སྔ་མ་ལྟར་ན་སུམ་སྟོང་དྲུག་བརྒྱ་དང་གཅིག ཕྱི་མ་ལྟར་ན་ཉིས་སྟོང་དང་གསུམ་བརྒྱ་ཞེ་གསུམ༑ འདས་མ་ཐག་པའི་མེ་ཕོ་ཁྱི་ལོ་ཡན་ལ་འདས་པའི་ཕྱིར་རོ། །འདི་གཉིས་ལ་ལོ་སྟོང་དང་ཉིས་བརྒྱ་བདུན་གྱི་ཁྱད་པར་བྱུང་བས་གང་རུང་གཅིག་མ་དག་པར་གསལ་ལ། དེ་ཡང་དུས་འཁོར་ལུགས་ནི། རྒྱལ་བ་མྱ་ངན་ལས་འདས་ནས་ལོ་དྲུག་བརྒྱ་ན་འཇམ་དཔལ་གྲགས་པ་བྱོན་པ་དང་། དེས་ལོ་བརྒྱར་རྩ་རྒྱུད་བསྟན་ནས། པད་