[B:9b]དུ་གཅེན་གྱི་ཞལ་ནས་ང་ནི་རྒས་འདུག ཁྱོད་གཞོན་པ་ཡིན་པས་གསང་སྔགས་གསར་འགྱུར་སློབས། དེ་ཡང་ད་ལྟ་འབྲོག་མི་ཤཱཀྱ་ཡེ་
[A:19]ཤེས་མཁས་པས་དེར་རྒྱུགས་གསུང་བ་ལ་དེར་མ་ཐོན། འཁྱིན་ལོ་ཙཱ་བ་ལ་ཀྱཻའི་རྡོ་རྗེའི་དབང་ཞུས། རྒྱུད་གསན། རྒྱུད་ཅུང་མ་རྫོགས་པ་ལ་འཁྱིན་ལོ་གྲོངས། ཆོས་འཕྲོ་འབྲོག་མིའི་དྲུང་དུ་ཞུས་གསུང་བ་ལྟར་ཞུར་བྱོན་པས༑ ཁྱོད་ཀྱིས་ཕ་ཤི་ནས་མེས་པོ་བསྙེགས་པ་ལེགས་གསུངས་ནས་དགྱེས། ཕྱིས་ཡུལ་ཞིང་འགའ་བཙོངས་ནས་རྟ་བཅུ་བདུན་དང་། རྩ་རིན་ནོར་བུའི་ཕྲེང་བ་དང་བཅས་པ་ཕུལ། གསུང་ངག་རིན་པོ་ཆེ་ཞུས། ལམ་སྐོར་ཆ་ལག་འགའ་རེ་གནང་༑ ཁྱད་པར་རྒྱུད་གསུམ་གྱི་བཤད་པ་རྒྱས་པར་གནང་ནས། བཤད་བཀའ་འཛིན་པའི་བུ་ཆེན་ལྔའི་ནང་ནས་མཆོག་ཏུ་གྱུར། གཞན་ཡང་འགོས་ལོ་ཙཱ་བ་ལ་གསང་འདུས་ཀྱི་སྐོར་གསན། ཨུ་རྒྱན་གྱི་པཎྜི་ཏ་ཤེས་རབ་གསང་བ་ལ་ཐིག་ལེ་ལྔའི་སྐོར༑ རྨ་ལོ་ཙཱ་བ་ལ་བདེ་མཆོག་དང་གྲུབ་རྙིང་གི་སྐོར་ལ་སོགས་པ་གསན། གཞན་ཡང་མལ་ལོ་ཙཱ་བ། བ་རི་ལོ་ཙཱ་བ། པུ་རངས་ལོ་ཙཱ་བ། གནམ་ཁའུ་པ་སྐུ་མཆེད། འཁོན་དགེ་བཅུ་བ། སྐྱུ་ར་ཨ་སེང་ལ་སོགས་པ་བླ་མ་དམ་པ་མང་པོ་ལ་སེམས་བསྐྱེད་དབང་བཤད་མན་ངག་མཐའ་ཡས་པ་གསན་ནས་སྔགས་གསར་རྙིང་མཐའ་དག་གི་བདག་པོར་གྱུར། ཞང་ཡུལ་གཡའ་ལུང་འཇག་ཤོངས་སུ་ཡབ་དང་གཅེན་གྱི་ཕྱི་རྟེན་བཞེངས། དེའི་ནང་དུ་སེང་ལྡེང་གི་ཕུར་པ་བྱིན་རླབས་ཅན་གཅིག་བཞུགས། བྲ་མོ་ལུང་པར་དགོན་ཆུང་གཅིག་བཏབ་ནས་ལོ་འགའ་བཞུགས་པས་དིང་སང་ས་སྐྱ་གོག་པོར་གྲགས་སོ། །དེའི་ཚེ་དཔོན་སློབ་རྣམས་ཀྱིས་སྐྱོ་བསང་ལ་བྱོན། རི་ཁ་ནས་གཟིགས་པས། དཔོན་པོ་རི་གླང་པོ་ཆེ་ཉལ་བ་འདྲ་བའི་མཁལ་ཁུང་
[A:20]གཡོན་