[A:553]lha dgu'i zhal gzigs/ de gnyal ston la bsnyad pas/ gnyal ston gyis nga la yang bstan par zhu byas pas/ khong gis kyang mthong / de nas stod lungs su gnas brtan shes rab grags kyis spyan drangs nas/ 'tshur lha lung gi dgon pa btab pas/ dbus gtsang khams gsum gyi grwa pa tshan che bar 'dus/ lha sar phebs pa'i tshe/ lha sa sde 'khrug gi rkyen gyis re hrul du song ba 'di gso bar mi nus sam snyam pa byung ba'i tshe/ mnal lam du rje sgam po bas khyod kyis nga 'jog phod dam gsung ba dang / jo bo shAkya'i sku la dngos su spyan chab byung bas de nyid du bzhugs nas gso nam rgyan phun sum tshogs pa dang bcas pa legs par grub/
de nas yar 'brog la sogs pa gnas gang na 'khrug pa dar ba rnams su byon nas gnya' dang gdums legs par gnang / 'di'i nang gi lha gzigs tshul dang / de slob ma la yang bstan pa la sogs pa ni grangs med/ phyag rgya chen po rtogs pas thugs kyi sgrib pa bral te/ gsung rab thams cad la thogs pa med pa'i smra ba po chen por gyur pas/ phyag sor ba la sogs pa'i mang du thos pa rnams kyis ni gus pas btud/ mkhas pa chen po gtsang nag pas/ skal med skye bo ring nas ngan brjod kyang / /mthong dang 'dris pa'i skye bo dad gyur la/ /mngon rlom dregs pa brgya dag zil gnon pa'i/ /bsod nams gzi ldan sku la skyabs su mchi/ /zhes bya bas bstod par yang mdzad do/ /'ol kha'i mgar phug tu lo gcig