[A:553]ལྷ་དགུའི་ཞལ་གཟིགས། དེ་གཉལ་སྟོན་ལ་བསྙད་པས། གཉལ་སྟོན་གྱིས་ང་ལ་ཡང་བསྟན་པར་ཞུ་བྱས་པས། ཁོང་གིས་ཀྱང་མཐོང༌། དེ་ནས་སྟོད་ལུངས་སུ་གནས་བརྟན་ཤེས་རབ་གྲགས་ཀྱིས་སྤྱན་དྲངས་ནས། འཚུར་ལྷ་ལུང་གི་དགོན་པ་བཏབ་པས། དབུས་གཙང་ཁམས་གསུམ་གྱི་གྲྭ་པ་ཚན་ཆེ་བར་འདུས། ལྷ་སར་ཕེབས་པའི་ཚེ། ལྷ་ས་སྡེ་འཁྲུག་གི་རྐྱེན་གྱིས་རེ་ཧྲུལ་དུ་སོང་བ་འདི་གསོ་བར་མི་ནུས་སམ་སྙམ་པ་བྱུང་བའི་ཚེ། མནལ་ལམ་དུ་རྗེ་སྒམ་པོ་བས་ཁྱོད་ཀྱིས་ང་འཇོག་ཕོད་དམ་གསུང་བ་དང༌། ཇོ་བོ་ཤཱཀྱའི་སྐུ་ལ་དངོས་སུ་སྤྱན་ཆབ་བྱུང་བས་དེ་ཉིད་དུ་བཞུགས་ནས་གསོ་ནམ་རྒྱན་ཕུན་སུམ་ཚོགས་པ་དང་བཅས་པ་ལེགས་པར་གྲུབ།
དེ་ནས་ཡར་འབྲོག་ལ་སོགས་པ་གནས་གང་ན་འཁྲུག་པ་དར་བ་རྣམས་སུ་བྱོན་ནས་གཉའ་དང་གདུམས་ལེགས་པར་གནང༌། འདིའི་ནང་གི་ལྷ་གཟིགས་ཚུལ་དང༌། དེ་སློབ་མ་ལ་ཡང་བསྟན་པ་ལ་སོགས་པ་ནི་གྲངས་མེད། ཕྱག་རྒྱ་ཆེན་པོ་རྟོགས་པས་ཐུགས་ཀྱི་སྒྲིབ་པ་བྲལ་ཏེ། གསུང་རབ་ཐམས་ཅད་ལ་ཐོགས་པ་མེད་པའི་སྨྲ་བ་པོ་ཆེན་པོར་གྱུར་པས། ཕྱག་སོར་བ་ལ་སོགས་པའི་མང་དུ་ཐོས་པ་རྣམས་ཀྱིས་ནི་གུས་པས་བཏུད། མཁས་པ་ཆེན་པོ་གཙང་ནག་པས། སྐལ་མེད་སྐྱེ་བོ་རིང་ནས་ངན་བརྗོད་ཀྱང༌། །མཐོང་དང་འདྲིས་པའི་སྐྱེ་བོ་དད་གྱུར་ལ། །མངོན་རློམ་དྲེགས་པ་བརྒྱ་དག་ཟིལ་གནོན་པའི། །བསོད་ནམས་གཟི་ལྡན་སྐུ་ལ་སྐྱབས་སུ་མཆི། །ཞེས་བྱ་བས་བསྟོད་པར་ཡང་མཛད་དོ། །འོལ་ཁའི་མགར་ཕུག་ཏུ་ལོ་གཅིག་