[A:547]'khor lo ni nyin dang mtshan du chad pa med par bskor/ de la rje btsun mi la ni thabs lam dang phyag rgya chen po logs logs su mi mdzad pa la/ sngags kyi snod du rung ba rnams la thabs lam gyi gdams ngag bstan/ dbang bskur med kyang pha rol tu phyin pa'i snod du rung ba rnams la phyag rgya chen po'i gdams pa btab ste/ lhan cig skyes sbyor zhes bya ba'i khrid rim yang mdzad/ de la dwags po'i rtogs chos kyang zer/ gsung rab rnams nas bla ma dang slob ma'i mtshan nyid mang bar gsungs na'ang / slob ma la mtshan nyid mang po mi dgos/ mos gus yong ba gcig pus chog gsung zhing / blun po dang dbul phongs dang sdig can du gyur ba 'ga' la yang phyag rgya chen po'i rtogs pa yun mi ring bar bskyed/ bka' gdams kyi bstan pa'i rim pa'i bstan bcos kyang mdzad/ gdams ngag kyang mang du gsungs pas/ 'di nas bka' phyag chu bo gnyis 'dres su grags te/ dge ba'i bshes gnyen gzhan dang mi mnyam pa'i snyan pas phyogs thams cad du khyab/ slob ma'i tshogs shin tu dul ba mtha' yas pa mnga' zhes gsungs pa bzhin/ sbyangs pa'i yon tan dang ldan zhing bla ma la mos pa thob/ 'jig rten 'di'i 'khri ba bcad nas gangs khrod dang / rdza ri dang / g.ya' ri dang / nags khrod dang / dben pa'i sa gang yang rung bar sgrub pa snying por byed pa'i slob ma yang bsam gyis mi khyab/ rab tu byung ba'ang thos bsam sngon du ma song ba'i btsun chung mang po yang rtogs pa la