[A:547]འཁོར་ལོ་ནི་ཉིན་དང་མཚན་དུ་ཆད་པ་མེད་པར་བསྐོར། དེ་ལ་རྗེ་བཙུན་མི་ལ་ནི་ཐབས་ལམ་དང་ཕྱག་རྒྱ་ཆེན་པོ་ལོགས་ལོགས་སུ་མི་མཛད་པ་ལ། སྔགས་ཀྱི་སྣོད་དུ་རུང་བ་རྣམས་ལ་ཐབས་ལམ་གྱི་གདམས་ངག་བསྟན། དབང་བསྐུར་མེད་ཀྱང་ཕ་རོལ་ཏུ་ཕྱིན་པའི་སྣོད་དུ་རུང་བ་རྣམས་ལ་ཕྱག་རྒྱ་ཆེན་པོའི་གདམས་པ་བཏབ་སྟེ། ལྷན་ཅིག་སྐྱེས་སྦྱོར་ཞེས་བྱ་བའི་ཁྲིད་རིམ་ཡང་མཛད། དེ་ལ་དྭགས་པོའི་རྟོགས་ཆོས་ཀྱང་ཟེར། གསུང་རབ་རྣམས་ནས་བླ་མ་དང་སློབ་མའི་མཚན་ཉིད་མང་བར་གསུངས་ནའང༌། སློབ་མ་ལ་མཚན་ཉིད་མང་པོ་མི་དགོས། མོས་གུས་ཡོང་བ་གཅིག་པུས་ཆོག་གསུང་ཞིང༌། བླུན་པོ་དང་དབུལ་ཕོངས་དང་སྡིག་ཅན་དུ་གྱུར་བ་འགའ་ལ་ཡང་ཕྱག་རྒྱ་ཆེན་པོའི་རྟོགས་པ་ཡུན་མི་རིང་བར་བསྐྱེད། བཀའ་གདམས་ཀྱི་བསྟན་པའི་རིམ་པའི་བསྟན་བཅོས་ཀྱང་མཛད། གདམས་ངག་ཀྱང་མང་དུ་གསུངས་པས། འདི་ནས་བཀའ་ཕྱག་ཆུ་བོ་གཉིས་འདྲེས་སུ་གྲགས་ཏེ། དགེ་བའི་བཤེས་གཉེན་གཞན་དང་མི་མཉམ་པའི་སྙན་པས་ཕྱོགས་ཐམས་ཅད་དུ་ཁྱབ། སློབ་མའི་ཚོགས་ཤིན་ཏུ་དུལ་བ་མཐའ་ཡས་པ་མངའ་ཞེས་གསུངས་པ་བཞིན། སྦྱངས་པའི་ཡོན་ཏན་དང་ལྡན་ཞིང་བླ་མ་ལ་མོས་པ་ཐོབ། འཇིག་རྟེན་འདིའི་འཁྲི་བ་བཅད་ནས་གངས་ཁྲོད་དང༌། རྫ་རི་དང༌། གཡའ་རི་དང༌། ནགས་ཁྲོད་དང༌། དབེན་པའི་ས་གང་ཡང་རུང་བར་སྒྲུབ་པ་སྙིང་པོར་བྱེད་པའི་སློབ་མ་ཡང་བསམ་གྱིས་མི་ཁྱབ། རབ་ཏུ་བྱུང་བའང་ཐོས་བསམ་སྔོན་དུ་མ་སོང་བའི་བཙུན་ཆུང་མང་པོ་ཡང་རྟོགས་པ་ལ་