[A:544]zhing mchog gi gtum mo gnang / de'i rtags khyad par can byung ba na khyod pho rgod rab tu 'dug gsung / de ltar zhabs drung der zla ba bcu gsum song / da dbus pa ston pa rang dbus su bzhud gsung nas zam sna cig gi bar du skyal nas/ der da 'jig rten blos thong la sgrub pa 'ba' zhig gyis/ dug gsum rgyas pa'i mi dang ma 'grogs/ de rnams kyi kha rlangs kyis rang gi dge sbyor 'grib pa yin pas/ gnas ri khrod dang dgon pa 'ba' zhig bsten/ da ste lo gsum na khyod la dge sbyor gsha' ma cig skye/ de'i dus du nga la'ang mthong snang 'di min pa cig 'ong gsung ba la sogs pa'i zhal bkod mang po gnang ste/ gnyal du phebs/ se ba lung bya ba'i dgon par bzhugs/ der bka' gdams pa'i dge 'dun mang po yod pas / 'di rnams kyi chos spyod kyi ram ma bteg na sdig sog dgongs nas ram bteg cing / de rnams dang spyod lam bstun pas ting nge 'dzin cung zhig 'gribs/ da 'dis mi 'ong bar 'dug dgongs nas lo gsum stan dang ma bral bar bsgom pa'i brtson 'grus bskyed pas gzod sems kyi ngo bo mthong / chos thams cad kyi de kho na nyid mkhyen/ bla mas gsungs pa'i dge sbyor gsha' ma de 'di yin par 'dug snyam pa dang / bla ma rje btsun de'ang chos kyi sku nyid du 'dug pa la/ rang res grub thob chen po cig tu gzung 'dug snyam pa'ang byung / de nas bla ma rje btsun gyi gsung bzhin du mi dang 'grogs lugs spangs te/ dben pa'i gnas mang por thogs re