[A:521]pa sangs rgyas kyang ding ri na bzhugs pa'i skabs shed du rje btsun dang mjal zhing gsung glengs bgyis/ chu bar du 'dre dmag byung ba de/ ngam rdzong ston pas chu pho 'brug gi lo yin par byas 'dug pas/ rje btsun gyi dgung lo bdun cu rtsa gsum par 'gyur/ rje btsun gyi slob ma yang ras pa mched brgyad du grags te/ gung thang gi gnyan chung ras pa/ lcem lung gi ngam rdzong ras pa/ rta mo'i 'bri sgom ras pa/ 'od khra'i se ban ras pa/ sni shang gi khyi ra ras pa/ ras pa zhi ba 'od/ bde ba skyong / ra rdzi ras pa rnams dang /
yang khyung tshang ba ye shes bla mas ni/ sras kyi thu bo lta bur gyur pa ras chung ba dang / sangs rgyas skye ba gcig gis thogs pa byang chub sems dpa'i sprul pa rje sgam po ba chen po dang / sgom la sran tshugs pa rong chus ras pa dang / drod la dbang thob pa rnal 'byor pa zhi ba skyong dang / dad pa dang dad mos gus su ldan pa 'bri sgom yang legs dang / jo rdor dang / zhang nag dang / se ban ston chung dang / lu skam ras pa dang / yon bdag mo legs se dang / rnal 'byor ma lcam me dang / sgron ne la sogs pa chos nyid kyi don rtogs pa mang du byung ngo zhes 'dren/ ras pa zhi ba 'od/ sangs rgyas skyabs/ rong chung ras pa gsum mkha' spyod du bzhud cing / lcam mo bi ta/ mdzes se/ chos kyi byang chub/ 'bring mtshams ma spa tshab gza' rnams kyang mkha' spyod du bzhud do/ /