[A:507]gsungs pa na/ chos rna bas nyan pa la rkang lag gi rtse thabs la 'gal ba ci zhig mchis zhes zhus pas/ 'o na mngon par 'gyur gyi nga'i chos rnams skyor cig gsungs pas/ nyin gsum du nyan pa'i chos thams cad kyi tshig ma nor bar skyor byung bas/ kun ha las te 'di ni sprul pa'i sku chen po zhig go zhes gleng bar byed do/ /de nas bla mas kyang nyid kyi sras su zhal gyis 'ches/ sngon rtsom pa mdzad pa rnams la dge slong gzhon nu 'od kyis sbyar zhes gsung ba la/ de nas rnal 'byor gyi dbang phyug gzhon nu 'od kyis sbyar zhes bya bar mdzad do/ /bdag med rdo rje de ni phyis rab tu byung ba'i mtshan chos kyi 'od zer du btags pa la/ 'gro ba'i mgon po 'phags pas chos sku 'od zer du mtshan gsol/ 'dis chos kyi grwa gang dang gang du byon pa'i tshe/ chos thams cad lan res 'dzin par nus pa de gzhan gyis rdzun nam snyam pa'i brtag pa byas kyang / de kho na bzhin du gyur pa la sogs pa'i che ba'i yon tan du ma yod pa rnams 'dir bris na shin tu mang bas/ 'di'i rnam thar kun spangs zhang gis mdzad pa las blta bar bya zhing / dus kyi 'khor lo'i brgyud tshul gyi skabs su yang shes par bya'o/ /'di ni yab dang yun ring du 'grogs su byung bas yab la bzhugs pa'i yon tan thams cad mnga'/ de la yon tan du ma mnga' ba'i kun mkhyen 'phags 'od kyis gsan/ de la bu rin po ches gsan pa yin te/ de yang bu rin po che bla ma rdo rje rgyal mtshan pa'i drung na dus 'khor