[A:507]གསུངས་པ་ན། ཆོས་རྣ་བས་ཉན་པ་ལ་རྐང་ལག་གི་རྩེ་ཐབས་ལ་འགལ་བ་ཅི་ཞིག་མཆིས་ཞེས་ཞུས་པས། འོ་ན་མངོན་པར་འགྱུར་གྱི་ངའི་ཆོས་རྣམས་སྐྱོར་ཅིག་གསུངས་པས། ཉིན་གསུམ་དུ་ཉན་པའི་ཆོས་ཐམས་ཅད་ཀྱི་ཚིག་མ་ནོར་བར་སྐྱོར་བྱུང་བས། ཀུན་ཧ་ལས་ཏེ་འདི་ནི་སྤྲུལ་པའི་སྐུ་ཆེན་པོ་ཞིག་གོ་ཞེས་གླེང་བར་བྱེད་དོ། །དེ་ནས་བླ་མས་ཀྱང་ཉིད་ཀྱི་སྲས་སུ་ཞལ་གྱིས་འཆེས། སྔོན་རྩོམ་པ་མཛད་པ་རྣམས་ལ་དགེ་སློང་གཞོན་ནུ་འོད་ཀྱིས་སྦྱར་ཞེས་གསུང་བ་ལ། དེ་ནས་རྣལ་འབྱོར་གྱི་དབང་ཕྱུག་གཞོན་ནུ་འོད་ཀྱིས་སྦྱར་ཞེས་བྱ་བར་མཛད་དོ། །བདག་མེད་རྡོ་རྗེ་དེ་ནི་ཕྱིས་རབ་ཏུ་བྱུང་བའི་མཚན་ཆོས་ཀྱི་འོད་ཟེར་དུ་བཏགས་པ་ལ། འགྲོ་བའི་མགོན་པོ་འཕགས་པས་ཆོས་སྐུ་འོད་ཟེར་དུ་མཚན་གསོལ། འདིས་ཆོས་ཀྱི་གྲྭ་གང་དང་གང་དུ་བྱོན་པའི་ཚེ། ཆོས་ཐམས་ཅད་ལན་རེས་འཛིན་པར་ནུས་པ་དེ་གཞན་གྱིས་རྫུན་ནམ་སྙམ་པའི་བརྟག་པ་བྱས་ཀྱང༌། དེ་ཁོ་ན་བཞིན་དུ་གྱུར་པ་ལ་སོགས་པའི་ཆེ་བའི་ཡོན་ཏན་དུ་མ་ཡོད་པ་རྣམས་འདིར་བྲིས་ན་ཤིན་ཏུ་མང་བས། འདིའི་རྣམ་ཐར་ཀུན་སྤངས་ཞང་གིས་མཛད་པ་ལས་བལྟ་བར་བྱ་ཞིང༌། དུས་ཀྱི་འཁོར་ལོའི་བརྒྱུད་ཚུལ་གྱི་སྐབས་སུ་ཡང་ཤེས་པར་བྱའོ། །འདི་ནི་ཡབ་དང་ཡུན་རིང་དུ་འགྲོགས་སུ་བྱུང་བས་ཡབ་ལ་བཞུགས་པའི་ཡོན་ཏན་ཐམས་ཅད་མངའ། དེ་ལ་ཡོན་ཏན་དུ་མ་མངའ་བའི་ཀུན་མཁྱེན་འཕགས་འོད་ཀྱིས་གསན། དེ་ལ་བུ་རིན་པོ་ཆེས་གསན་པ་ཡིན་ཏེ། དེ་ཡང་བུ་རིན་པོ་ཆེ་བླ་མ་རྡོ་རྗེ་རྒྱལ་མཚན་པའི་དྲུང་ན་དུས་འཁོར་