[A:504]thur la ba tshul khrims skyabs la gnang ba yin te/ de ni mdo sde dang rgyud sde thams cad mkhyen/ lo bcu gnyis sham thabs ma gyon par bstan thog gcig tu bsgoms pas grub pa brnyes te/ bskyed rim la brtan pa thob pas lha dngos su gzigs/ rdzogs pa'i rim pa la rtags thon zhing ngag rdo rje'i bzlas pa 'byongs/ snang ba sgyu mar shar/ thugs 'od gsal gyi ngang la bzhugs/ zung 'jug gi ting nge 'dzin la gnas nas tha dad kyi rtog pa thams cad bcom/ sangs rgyas dang 'dra bar bzhugs pa yin no/ /des thang be ba 'phags pa skyabs la gnang ba yin te/ de yang dang por rab tu byung nas sa gzhi dmar por song song du slob gnyer mdzad/ de nas bskyed rdzogs kyi don nyams su blangs pas nyams dang rtogs pa khyad par can skyes/ gshegs pa'i tshe gzims khang la 'ja'i skor sum rim du byung ba la sogs pa ngo mtshar ba'i ltas mang po byung ngo / /des gser sdings ba gzhon nu 'od la gnang ba yin te/ de ni sum pa skyil mkhar gyi ban rigs/ gzhon nu nas 'dul dkar gzhon nu tshul khrims la rab tu byung / jo bo nas brgyud pa'i lam rim man ngag dang bcas pa mang du gsan zhing thugs nyams su yang bab/ phyis mkhan po gtsang nag pa la sogs pa la bsnyen rdzogs pa zhus/ 'dul 'dzin chen por gyur te 'dul ba'i skor la sbyangs pa chen po mdzad/ lan cig gral thebs dpon la byon pas zhabs bsnyung nas shab kyi sna rings su bzhugs pa'i tshe/ glan