[A:504]ཐུར་ལ་བ་ཚུལ་ཁྲིམས་སྐྱབས་ལ་གནང་བ་ཡིན་ཏེ། དེ་ནི་མདོ་སྡེ་དང་རྒྱུད་སྡེ་ཐམས་ཅད་མཁྱེན། ལོ་བཅུ་གཉིས་ཤམ་ཐབས་མ་གྱོན་པར་བསྟན་ཐོག་གཅིག་ཏུ་བསྒོམས་པས་གྲུབ་པ་བརྙེས་ཏེ། བསྐྱེད་རིམ་ལ་བརྟན་པ་ཐོབ་པས་ལྷ་དངོས་སུ་གཟིགས། རྫོགས་པའི་རིམ་པ་ལ་རྟགས་ཐོན་ཞིང་ངག་རྡོ་རྗེའི་བཟླས་པ་འབྱོངས། སྣང་བ་སྒྱུ་མར་ཤར། ཐུགས་འོད་གསལ་གྱི་ངང་ལ་བཞུགས། ཟུང་འཇུག་གི་ཏིང་ངེ་འཛིན་ལ་གནས་ནས་ཐ་དད་ཀྱི་རྟོག་པ་ཐམས་ཅད་བཅོམ། སངས་རྒྱས་དང་འདྲ་བར་བཞུགས་པ་ཡིན་ནོ། །དེས་ཐང་བེ་བ་འཕགས་པ་སྐྱབས་ལ་གནང་བ་ཡིན་ཏེ། དེ་ཡང་དང་པོར་རབ་ཏུ་བྱུང་ནས་ས་གཞི་དམར་པོར་སོང་སོང་དུ་སློབ་གཉེར་མཛད། དེ་ནས་བསྐྱེད་རྫོགས་ཀྱི་དོན་ཉམས་སུ་བླངས་པས་ཉམས་དང་རྟོགས་པ་ཁྱད་པར་ཅན་སྐྱེས། གཤེགས་པའི་ཚེ་གཟིམས་ཁང་ལ་འཇའི་སྐོར་སུམ་རིམ་དུ་བྱུང་བ་ལ་སོགས་པ་ངོ་མཚར་བའི་ལྟས་མང་པོ་བྱུང་ངོ༌། །དེས་གསེར་སྡིངས་བ་གཞོན་ནུ་འོད་ལ་གནང་བ་ཡིན་ཏེ། དེ་ནི་སུམ་པ་སྐྱིལ་མཁར་གྱི་བན་རིགས། གཞོན་ནུ་ནས་འདུལ་དཀར་གཞོན་ནུ་ཚུལ་ཁྲིམས་ལ་རབ་ཏུ་བྱུང༌། ཇོ་བོ་ནས་བརྒྱུད་པའི་ལམ་རིམ་མན་ངག་དང་བཅས་པ་མང་དུ་གསན་ཞིང་ཐུགས་ཉམས་སུ་ཡང་བབ། ཕྱིས་མཁན་པོ་གཙང་ནག་པ་ལ་སོགས་པ་ལ་བསྙེན་རྫོགས་པ་ཞུས། འདུལ་འཛིན་ཆེན་པོར་གྱུར་ཏེ་འདུལ་བའི་སྐོར་ལ་སྦྱངས་པ་ཆེན་པོ་མཛད། ལན་ཅིག་གྲལ་ཐེབས་དཔོན་ལ་བྱོན་པས་ཞབས་བསྙུང་ནས་ཤབ་ཀྱི་སྣ་རིངས་སུ་བཞུགས་པའི་ཚེ། གླན་