[A:499]pa'i tshe mes po gshegs/ ra mo la sras gsum ste/ lcam me/ jo shAkya/ jo bsod/ lcam me'i sras nam mkha' dbang phyug de'i sras kun dga' dang dbang phyug 'bum gnyis/ kun dga'i sras rin chen rgyal po/ de la sras rin chen dpal/ grags pa rgyal mtshan/ kun dga' blo gros dang gsum/ phyi ma'i sras kun dga' bzang po'o/ /spre'u zhing du rin po che bkra shis dpal ba ni/ rin po che byang chub dpal ba nyid kyi gdung du 'khrungs/ chung ngu'i dus nas rab tu byung zhing rtses thang du chen po blo gros 'phel ba'i sar gtugs/ tshad ma'i slob gnyer mdzad/ de rting yab mes kyi chos rnams rin po che ba la tshang bar gsan zhing mkhas par yang gyur pa la/ rin po che ba nyid sku tshe shin tu ring bas dus chos tsam ma gtogs gzhan nas kyi nyan pa po ni ma byung / rin po che pa bzhugs ring la gdan sar bton/ de'i sras da lta'i gdan sa ba 'di'o/ /rje mar pa chu byi la 'khrungs nas ding sang gi me pho spre'u 'di yan la lo bzhi brgya dang drug cu rtsa lnga song ngo / /spyir rngog mdo sde'i slob ma rtsags la sogs pa'i skyes bu chen po rnams kyis bshad pa mdzad pa las rgya shin tu che bar 'phel zhing / brgyud pa phyi ma rnams kyis brtsams pi TI kas kyang lung sul thams cad khengs te/ mar rgyud kyi bshad pa la rngog brgyud 'di shin tu drin che'o/ /rngog pa'i brgyud pa'i skabs so/ /