[A:499]པའི་ཚེ་མེས་པོ་གཤེགས། ར་མོ་ལ་སྲས་གསུམ་སྟེ། ལྕམ་མེ། ཇོ་ཤཱཀྱ། ཇོ་བསོད། ལྕམ་མེའི་སྲས་ནམ་མཁའ་དབང་ཕྱུག དེའི་སྲས་ཀུན་དགའ་དང་དབང་ཕྱུག་འབུམ་གཉིས། ཀུན་དགའི་སྲས་རིན་ཆེན་རྒྱལ་པོ། དེ་ལ་སྲས་རིན་ཆེན་དཔལ། གྲགས་པ་རྒྱལ་མཚན། ཀུན་དགའ་བློ་གྲོས་དང་གསུམ། ཕྱི་མའི་སྲས་ཀུན་དགའ་བཟང་པོའོ། །སྤྲེའུ་ཞིང་དུ་རིན་པོ་ཆེ་བཀྲ་ཤིས་དཔལ་བ་ནི། རིན་པོ་ཆེ་བྱང་ཆུབ་དཔལ་བ་ཉིད་ཀྱི་གདུང་དུ་འཁྲུངས། ཆུང་ངུའི་དུས་ནས་རབ་ཏུ་བྱུང་ཞིང་རྩེས་ཐང་དུ་ཆེན་པོ་བློ་གྲོས་འཕེལ་བའི་སར་གཏུགས། ཚད་མའི་སློབ་གཉེར་མཛད། དེ་རྟིང་ཡབ་མེས་ཀྱི་ཆོས་རྣམས་རིན་པོ་ཆེ་བ་ལ་ཚང་བར་གསན་ཞིང་མཁས་པར་ཡང་གྱུར་པ་ལ། རིན་པོ་ཆེ་བ་ཉིད་སྐུ་ཚེ་ཤིན་ཏུ་རིང་བས་དུས་ཆོས་ཙམ་མ་གཏོགས་གཞན་ནས་ཀྱི་ཉན་པ་པོ་ནི་མ་བྱུང༌། རིན་པོ་ཆེ་པ་བཞུགས་རིང་ལ་གདན་སར་བཏོན། དེའི་སྲས་ད་ལྟའི་གདན་ས་བ་འདིའོ། །རྗེ་མར་པ་ཆུ་བྱི་ལ་འཁྲུངས་ནས་དིང་སང་གི་མེ་ཕོ་སྤྲེའུ་འདི་ཡན་ལ་ལོ་བཞི་བརྒྱ་དང་དྲུག་ཅུ་རྩ་ལྔ་སོང་ངོ༌། །སྤྱིར་རྔོག་མདོ་སྡེའི་སློབ་མ་རྩགས་ལ་སོགས་པའི་སྐྱེས་བུ་ཆེན་པོ་རྣམས་ཀྱིས་བཤད་པ་མཛད་པ་ལས་རྒྱ་ཤིན་ཏུ་ཆེ་བར་འཕེལ་ཞིང༌། བརྒྱུད་པ་ཕྱི་མ་རྣམས་ཀྱིས་བརྩམས་པི་ཊཱི་ཀས་ཀྱང་ལུང་སུལ་ཐམས་ཅད་ཁེངས་ཏེ། མར་རྒྱུད་ཀྱི་བཤད་པ་ལ་རྔོག་བརྒྱུད་འདི་ཤིན་ཏུ་དྲིན་ཆེའོ། །རྔོག་པའི་བརྒྱུད་པའི་སྐབས་སོ། །