[A:585]དུ་གསན་པའི་ཚེ་དང༌། ཏིང་ངེ་འཛིན་ལ་བཞུགས་པའི་ཚེ་དག་པའི་སྣང་བ་མང་དུ་ཤར་བ་རྣམས་ནི་རྣམ་པར་ཐར་པ་ཉིད་ལས་བལྟ་བར་བྱ་བ་ཡིན་གྱི། འདིར་ཕྱོགས་ཙམ་ལས་མ་བྲིས་སོ། །ཆོས་རྗེ་རང་བྱུང་བས་མཛད་པའི་བསྟན་རྩིས་ནི་དུས་འཁོར་བ་གཞན་རྣམས་ཀྱི་ལོ་གྲངས་ཀྱི་འདོད་པ་ལས། ལག་པ་གདེངས་ཅན་ཟླ་བས་དམན་པ་ཡིན་ཏེ། གྲུབ་ཆེན་ཨུ་རྒྱན་པའི་བསྟན་རྩིས་དང་མཐུན་ནོ། ། ། །
ཆོས་རྗེ་རང་བྱུང་བའི་སློབ་མ་ནི་གཡུང་སྟོན་རྡོ་རྗེ་དཔལ་བ་ཡིན་ཏེ། དེས་རང་གིས་ཆོས་རྗེ་རང་འབྱུང་བ་ལ་གསན་པ་རྣམས། ཆོས་རྗེ་རོལ་པའི་རྡོ་རྗེ་གཞོན་ནུར་བཞུགས་པ་ལ་སྐུ་སྐྱེ་བ་སྔ་མའི་ཆོས་རྣམས་སྐྱེལ་དུ་བྱོན་ཏེ། གཡུང་སྟོན་པའི་རྣམ་པར་ཐར་པ་རགས་པ་ཞིག་ནི། སྒྱུ་འཕྲུལ་གྱི་སྐབས་སུ་བཤད་ཟིན་ཏོ། །
ཆོས་ཇེ་རོལ་པའི་རྡོ་རྗེ་ནི། ཆོས་རྗེ་རང་བྱུང་རྡོ་རྗེ་ཉིད་ཀྱིས་སྐྱེ་བ་གསར་དུ་བཞེས་པ་ལྟར་མཛད་པ་སྟེ། ཏ་དབེན་གུ་ཤྲཱིས་དྲུང་ནས་ད་གཟོད་གང་དུ་སྐྱེ་བ་བཞེས་པར་ཁོ་བོ་ཡང་དེར་འོང་འདོད་པས་ངེས་པ་ཅིག་གསུང་བར་ཞུས་པ་ལ། ཁྱོད་དེ་ཙམ་དུ་མོས་ན་ང་ཀོང་པོར་འོང་གསུང་བ་ལྟར་སྐུ་ཕྲ་བའི་དུས་ནས་ཀོང་པོར་ཕེབས་པ་ཡིན་ཏེ། དེ་ཡང་ཡུལ་རྡོད་ཀྱི་ཨ་ལ་རོང་གོ་ཆེན་སྤང་དཀར་གྱི་གནམ་རྫོང་དུ། ཡབ་ལྷ་མདོང་བསོད་ནམས་དོན་གྲུབ་དང༌། ཡུམ་ཡེ་ཤེས་ཀྱི་མཁའ་འགྲོ་འཛོ་བ་གཟའ་བརྩོན་འགྲུས་རྒྱན་གཉིས་ལྷན་ཅིག་ཏུ་གནས་པ་ན། རྗེ་བཙུན་འདི་དགའ་ལྡན་དུ་