[A:539]ཆུབ་སེམས་དཔའ་མེ་ཏོག་ཟླ་མཛེས་ཞེས་བྱ་བར་གྱུར་ནས། ཀུན་ཏུ་བཟང་པོ་ཞེས་བྱ་བའི་ནགས་སུ་བྱང་ཆུབ་སེམས་དཔའ་མང་པོ་ལ་ཆོས་བསྟན་ཞིང༌། ཕྱིས་རྒྱལ་པོའི་ཕོ་བྲང་འཁོར་དུ་སྐྱེ་བོ་མང་པོ་ལ་ཆོས་བསྟན་པས། རྒྱལ་པོ་དཔའ་བས་བྱིན་གྱིས་གཤེད་མ་ལ་བསྒོས་ནས་མེ་ཏོག་ཟླ་མཛེས་བསད་ཅིང་དུམ་བུར་གཏུབས་པ་ལས། དུམ་བུ་རྣམས་ཀྱང་ཁ་དོག་མ་ཉམས་པར་ཡུན་རིང་དུ་འདུག་པ་མཐོང་ནས། རྒྱལ་པོ་ཆེར་འགྱོད་དེ་བཤགས་པ་བྱས་པ་ལ་སོགས་པའི་གཏམ་རྒྱ་ཆེར་མདོ་ཉིད་ནས་གསལ་བ་ལ། རྒྱལ་པོ་དཔའ་བས་བྱིན་ནི་སྟོན་པ་ཐུབ་པའི་དབང་པོ་ཡིན་པ་དང༌། མེ་ཏོག་ཟླ་མཛེས་ཟླ་འོད་གཞོན་ནུར་གྱུར་པ་ཉིད་ཡིན་པ་དང༌། ཟླ་འོད་གཞོན་ནུ་ཆོས་རྗེ་སྒམ་པོ་བར་གྱུར་པ་ལ་སོགས་པ་ལ་སྐལ་པ་དང་ལྡན་པའི་སྐྱེ་བོ་རབ་ཏུ་མང་པོ་ཡིད་ཆེས་པར་གྱུར་ཏེ། དེའི་བཀའ་བརྒྱུད་འཛིན་པ་རྣམས་ཀྱིས་ཀྱང་མདོ་སྡེ་ཏིང་ངེ་འཛིན་གྱི་རྒྱལ་པོ་ལ་གཅེས་པར་འཛིན་ཞིང་མཆོད་པར་མཛད་པ་ཡིན་ནོ། །དོན་འདི་ནི་དགེ་བའི་བཤེས་གཉེན་པོ་ཏོ་བའི་ཞལ་ནས། ད་ལྟར་གྱི་ཕྱག་རྒྱ་ཆེན་པོ་སྐད་པ་ཅིག་ཡོད་དེ། དེ་མདོ་སྡེ་ཏིང་ངེ་འཛིན་གྱི་རྒྱལ་པོའི་དོན་ཡིན། འོ་སྐོལ་ནི་དེ་ལ་དམད་པར་ཡང་མི་བྱ་ལ། འཇུག་པར་ཡང་མི་བྱ་གསུང་བའི་དོན་དེ་ཡང༌། སྒམ་པོ་བ་ཟླ་འོད་གཞོན་ནུ་ཡིན་པ་ལ་དགོངས་པ་ཡིན། དེ་ལྟ་བས་ན་སྒམ་པོ་བའི་ཆེ་བའི་ཡོན་ཏན་ནི་གསུང་རབ་ཐམས་ཅད་ལས་བཤད་པའི་སངས་རྒྱས་ཀྱི་ཡོན་ཏན་རྣམས་ཉིད་ཡིན་པས་ན། ཡོན་ཏན་གྱི་ཚད་སྨོས་སུ་ལྟ་ཅི་ཡོད་མོད། དེ་ལྟ་ན་ཡང་སྐྱེ་བོ་ཕལ་