[A:538]རྩིས་ཡིན་ནོ། །བདེ་མཆོག་སྙན་བརྒྱུད་དང་རས་ཆུང་སྙན་བརྒྱུད་ཀྱི་སྐབས་སོ། ། ། །
སྒམ་པོ་བ་གདན་ས་དང་བཅས་པའི་སྐབས།
རྗེ་བཙུན་མི་ལའི་བུ་སློབ་རྣམས་ཀྱི་མཆོག་ཏུ་གྲགས་པའི་རྗེ་སྒམ་པོ་བ་ནི། རྒྱལ་བ་ཡང་དགོན་པས། སྤྲུལ་པས་སྤྲུལ་པའི་བརྒྱུད་འཛིན་སྒམ་པོ་བ། །ཞེས་གསུངས་པ་ལྟར། རྒྱལ་པོའི་ཁབ་ཀྱི་གྲོང་ཁྱེར་དུ་ཁྱིམ་བདག་ཆེན་པོ་ཕྱུག་ཅིང་རིགས་མཐོ་བའི་སྲས་ཟླ་འོད་གཞོན་ནུར་གྱུར་པའི་ཚེ། བྱ་རྒོད་ཕུང་པོའི་རི་ལ་ཐུབ་པའི་དབང་པོ་ལ་མདོ་ཏིང་ངེ་འཛིན་གྱི་རྒྱལ་པོ་ཞུས་ཤིང༌། དེ་ཉིད་ཀྱི་ཚེ་རང་གི་ཁྱིམ་དུ་སྟོན་པ་འཁོར་དང་བཅས་པ་སྤྱན་དྲངས་ནས་ལེགས་པར་བསྙེན་བཀུར། སྟོན་པར་ཀྱང་ཁྱོད་ཀྱིས་སྙིགས་མའི་དུས་སུ་མདོ་སྡེ་འདི་ཟུང་ཅིག་ཅེས་བཀའ་སྩལ། ཟླ་འོད་གཞོན་ནུར་གྱུར་པས་ཀྱང་སྲོག་དང་བསྡོས་ཏེ་མདོ་སྡེ་འཛིན་པར་ཞལ་གྱིས་བཞེས། སྟོན་པས་ཀྱང་ཁྱོད་མདོ་སྡེ་འཛིན་པའི་ཚེ་རང་ཉིད་ཀྱིས་གྲོགས་བྱེད་དོ་ཞེས་བཀའ་སྩལ་བའི་བྱང་ཆུབ་སེམས་དཔའ་ཟླ་འོད་གཞོན་ནུ་དེ་ནི་རྗེ་སྒམ་པོ་བ་དང༌། གྲོགས་མཛད་པར་ཞལ་གྱིས་བཞེས་པའི་ཐུབ་པ་ནི་སློབ་དཔོན་ཕག་མོ་གྲུབ་ལེགས་པར་གདའ། ཟླ་འོད་གཞོན་ནུར་གྱུར་པ་དེ་ཡང་བསྐལ་པ་གྲངས་མེད་པའི་སྔོན་རོལ་ཏུ། དེ་བཞིན་གཤེགས་པ་རིན་པོ་ཆེ་པདྨའི་ཟླ་བ་རྣམ་པར་དག་པ་མངོན་པར་འཕགས་པའི་རྒྱལ་པོའི་བསྟན་པ་འགྲིབས་པ་ན། བྱང་