[A:518]སྤྱད་དེ་སྤྱན་སྔར་ཕྱིན། །ཞལ་མཐོང་བ་རང་གིས་སྣང་བ་འགྱུར། ཁོང་ཚེ་རབས་ཀྱི་བླ་མ་ཡིན་པ་འདྲ། །ཕ་སྐུ་དྲིན་ཅན་གྱི་ཞབས་དྲུང་དུ། །ལོ་དྲུག་ཟླ་མཐོང་བརྒྱད་དུ་བསྡད། །ལུས་སྐུ་དང་གྲིབ་མ་བཞིན་དུ་འགྲོགས། །ཟང་ཟིང་གི་འབུལ་རྒྱུ་མ་མཆིས་ཏེ། །ལུས་ངག་གི་ཞབས་ཏོག་རྡུལ་དུ་བརླགས། །ཐུགས་གཏིང་ནས་མཉེས་པའི་ནད་ཀ་དེས། །སྙན་བརྒྱུད་ཀྱི་གདམས་ངག་རྫོགས་པར་གནང༌། །ཞེས་བྱ་བ་ལ་སོགས་པ་གསུངས་པ་དེ་ཡིན་ནོ། །དེ་ཡན་ཆད་ཅུང་ཟད་ཞིབ་པར་བྲིས་ཏེ། བཅོས་མ་མང་པོ་མཐོང་བས་འདི་ཙམ་ཞིག་འཐད་པ་ཡིན་ནོ་སྙམ་ནས་བགྱིས་སོ། །དེ་ལ་རྗེ་བཙུན་གྱིས་རང་ལོ་སུམ་ཅུ་རྩ་བརྒྱད་པ་ལ་མར་པའི་ཞབས་དྲུང་དུ་བྱོན། དེར་ལོ་བཞི་བཅུ་རྩ་བཞིའི་བར་དུ་བཞུགས། ཞེ་ལྔ་པ་ནས་སྒྲུབ་པ་ལ་ཞུགས་ཞེས་ཡི་གེ་གཞན་ལས་བྱུང་བ་དང༌། འབྲི་ཁུང་ཆོས་རྗེའི་ཞལ་ནས། རྗེ་བཙུན་གྱིས་ཞི་བར་གཤེགས་གཤེགས་ཀྱི་བར་ལོ་བཞི་བཅུར་སྐུ་ལུས་སྒོམ་ཐག་དང་མ་བྲལ་བ་ཡིན་ཞེས་གསུངས་པ་དང་ཡང་འབྱོར་རོ། །དེ་ནས་རྗེ་མར་པའི་ཞབས་དྲུང་ནས་བྱོན་ཏེ་ལམ་དུ་རྔོག་ལའང་ཕྱག་མཛད། ཡུལ་དུ་ཕེབས་པའི་ཚེ། མ་འདས་ནས་ཁང་སྟོང་དེའི་གོ་ཕུགས་ཤིག་ན་རུལ་བུ་བེམས་པོས་གཡོགས་པ་ཞིག་འདུག་པ་ལ་སྔས་མཛད་དེ་ཞལ་གཅིག་རིག་པ་གཏད་ནས་སྡིག་པ་སྦྱངས། སྤུར་དེ་མེས་བསྲེགས། སྲིང་མོ་ཞིང་ཡོད་པའང་ཡུལ་འཁྱར། ཡུམ་སྲས་གཉིས་ཀྱི་ཞིང་སྐལ་ཞིག་ཡོད་པ་སུས་ཀྱང་འདེབས་མ་ནུས་པར་འདུག ཨ་ནེ་དེ་སྔོན་དགྲ་ཡིན་ཀྱང༌། རྗེ་བཙུན་ལ་ཚིག་འཇམ་