[A:517]པོ་འདུག་པས་སྦྱོང་དུ་བཅུག་པ་ཡིན། རྔོག་གིས་བྱིན་པའི་གདམས་ངག་དེ་རྣམས་ངའི་མདུན་དུ་ཤོད་དང་གསུང༌། རྔོག་ཐེགས་ནས་མི་ལས་སྐྱེལ་ཐུང་རིང་དུ་མཛད། དེ་རྟིང་བླ་མས་གདམས་ངག་རྣམས་ཡང་དག་པར་ཚང་བར་གནང༌། འདི་ལས་ལྷག་པ་ཡོད་རེ་ཞེས་མཁའ་འགྲོ་དཔང་དུ་བཞག་པའི་དབུ་བསྙུང་མཛད། གྲོ་བོ་ལུང་ནས་ཡ་ཟད་ན་རྟ་ནག་ཕུག་བྱ་བ་ཡོད་པས། དེར་མཚམས་གཅོད་དུ་བཅུག འབད་པ་ཆེན་པོས་བསྒོམས་ཀྱང་ཡོན་ཏན་ཆེན་པོ་མ་སྐྱེས། དོན་དེ་རྣམས་ཕྱིས་ཞི་བ་འོད་ལ་མགུར་དུ་བཞེངས་པ། འོ་ན་ཁྱེའུ་ཆུང་བཞིན་ལེགས་པོ། །ཁྱོད་རྟོགས་འདོད་ཅན་དེ་ཚུར་ཉོན་དང༌། །མི་ང་ངོ་ཁྱོད་ཀྱིས་ཤེས་མ་ཤེས། །མི་ང་ངོ་ཁྱོད་ཀྱིས་མ་ཤེས་ན། །ང་གུང་ཐང་གི་མི་ལ་རས་པ་ཡིན། །ལྟེ་བ་གུང་ཐང་གི་སྨད་དུ་བཅད། །སློབ་གཉེར་དབུས་གཙང་གི་ཕྱོགས་སུ་བགྱིས། །ཕ་དར་སྟོན་དང་ངབ་མིས་དབུ་མཛད་ནས། །རོང་སྟོན་ལྷ་དགའ་ཡན་ཆད་དུ། །སྤྱིར་དྲིན་ཅན་གྱི་བླ་མ་བཅུ་ཙམ་བཞུགས། ཁྱད་པར་ལྷ་རྗེ་སྣུབས་ཆུང་ལ། །དྲག་སྔགས་གཟའ་གདོང་དམར་ནག་ཞུས། ཁོང་ལྟ་དགོངས་ཀྱི་མཁྱེན་པ་མཐོ་ལགས་ཤིང༌། །དམར་ཁྲིད་ཀྱི་ཕྱག་བཞེས་མཁས་ན་ཡང༌། །མི་ཁོ་བོའི་སྤྲོས་པ་ཅུང་མ་ཆོད། །རྗེ་ན་རོ་དང་མཻ་ཏྲིས་བྱིན་བརླབས་ཤིང༌། ལུས་རྟེན་འབྲེལ་གནད་དུ་བསྣུན་ནས་ཀྱང༌། །སེམས་ཆོས་ཉིད་མ་དང་སྤྲོད་པ་ཅིག །ལྷོ་ཕུ་ཆུ་ཁྱེར་ན་བཞུགས་སོ་སྐད། །ཕ་ལོ་ཙཱའི་སྙན་པ་རྒྱང་ནས་འཁུམས། །མཚན་ཐོས་པ་ཙམ་གྱིས་བ་སྤུ་གཡོས། །ལམ་དཀའ་བ་