[A:460]སེང༌། རྗེ་བཙུན་རྒྭ་ལོ། བླ་མ་ཤེས་རབ་སེང་གེ་བ་ཁུ་དབོན་སྐུ་མཆེད་
རྣམས་ལ་ནར་མར་བྱུང་ཞིང༌། དེ་དག་ལས་མཆེད་པ་ཡང་བགྲང་པར་མི་ནུས་སོ། །གཤིན་རྗེ་གཤེད་དམར་པོའི་རྒྱུད་ལེའུ་བཅུ་དགུ་པ་ལ། ལོ་ཙཱ་བ་གྲགས་པ་རྒྱལ་མཚན་དང་
ཤོང་བློ་བརྟན་གཉིས་ཀྱི་འགྱུར་སྣང་ནའང༌། རྒྱུད་ལ་བཤད་པའི་སྲོལ་བྱུང་བར་ནི་མི་ཐོས་ལ། གཤིན་རྗེ་གཤེད་དམར་པོ་ལ་ཡི་དམ་དུ་མཛད་པ་ནི་དཔྱལ་ཆོས་བཟངས་དང༌། ཆག་ལོ་ཙཱ་བ་དང༌། བུ་རིན་པོ་ཆེ་ལ་སོགས་མང་ངོ༌།
།གཞན་ཡང་གྲུབ་ཐོབ་དར་པཎ་དང་རེ་བེནྡའི་སློབ་མ་གློ་བོ་ལོ་ཙཱ་བ་ཤེས་རབ་རིན་ཆེན་གྱིས་བི་རཱུ་བ་ལས་བརྒྱུད་པའི་གཤེད་དམར་གྱི་མན་ངག་གཞུང་ཆུང་དང་བཅས་པ་ཡང་དབུས་གཙང་དུ་མང་དུ་མཆེད་ནའང༌། དར་པཎ་ལས་བརྒྱུད་པའི་རྒྱུད་ཀྱི་བཤད་པ་ནི་བྱུང་བར་མ་ཐོས་སོ།
།གཤེད་སྐོར་གྱི་སྐབས་སོ། །
བདེ་མཆོག་གི་སྐབས།
དཔལ་བདེ་མཆོག་གི་དབང་དང་རྒྱུད་ཀྱི་བཤད་པ་སྒྲུབ་ཡིག་དང་བཅས་པ་མང་དུ་བྱུང་བ་རྣམས་དང་པོར་ལོ་ཆེན་སློབ་བརྒྱུད་དང་བཅས་པ་ལ་ཡང་བྱུང་ཞིང༌། ཕྱིས་ནི་མར་པ་དོ་བ་དང༌། སྤུ་ཧྲངས་ལོ་ཆུང་དང༌། མལ་གྱོ་ལ་སོགས་པ་ལས་རྒྱུད་ཀྱི་བཤད་པ་མང་དུ་བྱུང་སྟེ།
དེ་ཡང་རྗེ་འཆང༌། ཕྱག་ན་རྡོ་རྗེ། ས་ར་ཧ། ཤ་བ་རི་དབང་ཕྱུག་དེའི་སློབ་མ་ལཱུ་ཡི་པ་ཡིན་ཏེ། འདི་ལ་ཁ་ཅིག་ནི་ལུ་ཨི་པ་ཞེས་ཟེར། ཁ་ཅིག་ནི་ལུ་