[A:455]ལས་ཀྱང་མང་དུ་མཆེད་ཅིང༌། ནག་ཚོས་རོང་པ་ཕྱག་སོར་བ་ལ་གཤེད་སྐོར་བཤད་པ་ལས་
ཀྱང་མཆེད། འགོས་ཀྱིས་ཀྱང་གཤིན་རྗེ་གཤེད་ཀྱི་རྒྱུད་ལ་བཤད་པ་འགའ་རེ་མཛད། སྙིང་མའི་འཆར་ཀར་གྲགས་པ་ལ་ཡང་ཕྱག་ལེན་མཛད་དོ། །ལོ་ཙཱ་བ་གཞན་དག་ལ་ཡང་
ལུང་ཙམ་བྱུང་མོད་ཀྱི། རྭ་ལོ་ཙཱ་བ་རྡོ་རྗེ་གྲགས་ཀྱིས་གཤེད་སྐོར་མང་དུ་བཤད་ཅིང༌། རྒྱུན་ཡང་རིང་དུ་གནས་པ་ཡིན་ནོ།
།དེ་ལ་རྭ་ལོ་ཙཱ་བ་རྡོ་རྗེ་གྲགས་ནི། སྙེ་ནམ་སྣང་ཡུལ་དུ་འཁྲུངས། བྱིས་པའི་དུས་ན་ལྷ་མོ་རེ་མ་ཏིས་ཕུ་རུང་ནང་དུ་བཅུག་ནས་ཟླ་བ་གཉིས་སུ་ཁམས་བསྐོར་ཞིང༌། དེ་ནས་མ་ལ་གཏད། དུས་ཕྱིས་རབ་ཏུ་བྱུང་ཞིང་བསྙེན་པར་ཡང་རྫོགས། དེ་ནས་བལ་ཡུལ་དུ་བལ་པོ་ཐུགས་རྗེ་ཆེན་པོ་ལ་གཙོ་བོར་བརྟེན་ཅིང༌། དེ་ལ་ནཱ་རོ་པ་ནས་པྲཛྙཱ་རཀྵི་ཏ། དེས་བལ་པོ་ཐུགས་རྗེ་ཆེན་པོ་ལ་གསུངས་ནས། དེ་ལ་རྭ་ལོས་ལེགས་པར་གསན་ཞིང་
མང་དུ་མཁྱེན་པ་ནི། འདི་ལྟ་སྟེ། བདེ་མཆོག་རྩ་རྒྱུད་དང་། སམྦུ་ཊ་དང༌། རྡོ་རྗེ་མཁའ་འགྲོ་དང་། རྒྱུད་བླ་མ་མངོན་བརྗོད་བླ་མ་དང༌། ཧེ་རུ་ཀ་མངོན་འབྱུང་དང༌། ཀུན་སྤྱོད་དང༌། ཕག་མོ་མངོན་འབྱུང་དང༌། ནག་པོའི་ཆོས་དྲུག་དང༌། ལཱུ་ཡི་པ། རྡོ་རྗེ་འཇིགས་བྱེད་ཀྱི་སྐོར་དང༌། གཤིན་རྗེ་གཤེད་ནག་པོའི་སྐོར་དང་། གདོང་དྲུག་གི་སྐོར་དང༌། མཚན་བརྗོད་དང༌། ཞལ་གཉིས་མའི་སྐོར་དང་། སྒོམ་གྱི་གདམས་ངག་དང༌། བར་ཕུ་དང་མགོན་ཆུང་ལ་སོགས་པ་སྲོག་སེར་གྱི་གདམས་པ་དང་བཅས་པ་མཁྱེན།
དེ་རྣམས་པནྚི་ཏ་འབའ་