[A:419]བྲམ་ཟེ་རིན་ཆེན་རྡོ་རྗེ། བ་ར་ཧི་ཏ། ཧ་སུ་མ་ཏི། སྤ་ཚབ་ལོ་ཙཱ་བ་ཞེས་འཆད་དོ། །སྤ་ཚབ་བརྒྱུད་པ་དང་བཅས་པའི་སྐབས་སོ། །
མངོན་པའི་བརྒྱུད་པའི་སྐབས།
གངས་ཅན་གྱི་ཁྲོད་དུ་མངོན་པ་ཀུན་ལས་བཏུས་ཀྱི་བཤད་པ་རྒྱུན་ཆགས་སུ་བྱུང་བའི་བརྒྱུད་པ་ནི་སངས་རྒྱས་བྱམས་པ། ཐོགས་མེད། དབྱིག་གཉེན། བློ་བརྟན། གང་སྤེལ། ཁ་ཆེ་ཛི་ན་མི་ཏྲ། ཀ་ཅོག་ ཞང་གསུམ། དེས་ལྷ་ལུང་དཔལ་གྱི་རྡོ་རྗེ། ནམ་ནང་ཟླ་བའི་རྡོ་རྗེ། དབས་རྒྱལ་བ་ཡེ་ཤེས་གསུམ་ལ་བཤད། དང་པོ་གཉིས་ཀྱིས་བསྒོམས་པས་གྲུབ་པ་ཐོབ། དབས་དབུས་སུ་འཁྲུག་པ་བྱུང་ནས་ཁམས་སུ་གཤེགས། དེ་ལ་གྲུམ་རྒྱལ་བའི་ཡེ་ཤེས། དེ་ནས་གྲུ་མཆོག་གི་ཡེ་ཤེས། སེ་བཙུན། གར་མི་ཡོན་ཏན་གཡུང་དྲུང༌། ཁུ་སྟོན་བརྩོན་འགྲུས་གཡུང་དྲུང༌། རྭ་ཁྲི་བཟང་འབར། རྒྱ་ཚུལ་ལེ། ལི་བདུད་རྩི་གྲགས་རྣམས་བྱུང་བ་ལས། རྭ་ཁྲི་བཟངས་ལ་བྲང་ཏི་དར་མ་སྙིང་པོས་གསན། བྲང་ཏི་ནི་སློབ་མ་ཤིན་ཏུ་མང་སྟེ། རྔོག་ལོ་ཙཱ་བ་ཆེན་པོ་པནྚི་ཏ་འབུམ་ཕྲག་གསུམ་པ་མཇལ་བའི་ཕྱིར་འཁོར་དགེ་སློང་སུམ་བརྒྱ་དང་བཅས་ཏེ་བྱོན་པའི་ཚེ། ལོ་ཙཱ་བའི་དགེ་སློང་རེ་རེ་ལ་བྲང་ཏིས་ཁོང་རང་གི་སློབ་མ་དགེ་སློང་བཅུ་གསུམ་བཅུ་གསུམ་བསྙེན་བཀུར་བྱེད་དུ་བཅུག་ཅེས་གྲགས། བྲང་ཏི་ལ་ཀོ་བོ་ཡེ་ཤེས་འབྱུང་གནས། དེ་ལ་རོག་ཆོས་ཀྱི་བརྩོན་འགྲུས། འདི་ལ་བརྟེན་ནས་