[A:393]ཡང་འཁོན་དཀོན་མཆོག་རྒྱལ་པོས་ས་སྐྱ་བཏབ་པ་དང་ལོ་གཅིག གསང་ཕུ་ནས་རྭ་སྒྲེང་དུ་སྟོན་པ་སྐུ་མཆེད་རྣམས་མཇལ་བ་ལ་ཡང་ལན་མང་དུ་ཕེབས་ཏེ། ཇོ་བོའི་ཆོས་ལ་གཙོ་བོར་མཛད་པ་ཡིན། དེའི་དབོན་པོ་རྔོག་ལོ་ཆེན་པོ་དེ་ནི། ཆོས་སྐྱབས་ཀྱི་སྲས་སུ་ས་མོ་ཕག་གི་ལོ་ལ་འཁྲུངས། གཞོན་ནུའི་དུས་ནས་ཁུ་བོའི་དྲུང་དུ་བྱོན། ཁུ་བོ་དང་གཟུས་ཀྱི་སློབ་མ་སྦོ་ཆུང་བ་ཚུལ་ཁྲིམས་ཤེས་རབ་ལ་སོགས་པའི་སར་ཡང་གསན་པ་མང་དུ་མཛད། ཁོང་གི་ཤེས་རབ་མཆོག་ཏུ་གྱུར་པ་དེ་ལ་ཁུ་བོ་མཉེས་ནས་ལོ་བཅུ་བདུན་བཞེས་པའི་ཚེ་ཁ་ཆེར་སློབ་གཉེར་ལ་བརྫངས། དེའི་ཚེ་རྭ་ལོ། གཉན་ལོ། ཁྱུང་པོ་ཆོས་བརྩོན། རྡོ་སྟོན། གཙན་ཁ་བོ་ཆེ་རྣམས་དང་ལྷན་ཅིག་འགྲོགས་ནས་བྱོན་པས། མངའ་བདག་རྩེ་ལྡེས་དབུས་གཙང་ཁམས་གསུམ་གྱི་སྡེ་སྣོད་འཛིན་པ་རགས་པ་རྣམས་སྤྱན་དྲངས་ནས། མེ་ཕོ་འབྲུག་གི་ལོའི་ཆོས་འཁོར་མཛད་པ་ཐུག རྩེ་ལྡེའི་སྲས་པོ་དབང་ཕྱུག་ལྡེས་རྔོག་གི་ཡོན་བདག་བྱ་བར་ཆད་ནས། ཁ་ཆེར་བྱོན་ཏེ། པནྚི་ཏ་སཛྫ་ན་དང༌། པར་ཧེ་ཏ་བྷ་དྲ་ལ་སོགས་པ་དྲུག་ཙམ་བསྟེན། བར་དུ་རྒྱགས་ཆད་ནས་ཁ་ཆེ་གསེར་སློངས་བྱ་བའི་ཡི་གེ་མངའ་རིས་སུ་བཏང་བ་ལས། དབང་ལྡེས་གསེར་མང་པོ་ཡང་བསྐུར། ཚད་མ་རྒྱན་བསྒྱུར་ཅིག་བྱ་བའི་ཞུ་བ་བྱུང་བས། པནྚི་ཏ་སྐལ་ལྡན་རྒྱལ་པོ་དང་རྔོག་གཉིས་ཀྱིས་ལེགས་པར་བསྒྱུར། དེར་ཁ་ཆེར་ལོ་བཅུ་བདུན་དུ་ཡང་དག་པར་སྦྱངས་ནས། སླར་བོད་དུ་བྱོན། བོད་དུ་ཡང་པནྚི་ཏ་འབུམ་ཕྲག་གསུམ་པ་དང༌། སུ་མ་ཏི་ཀཱིརྟི་གཉིས་ལ་ཆོས་