[A:༤༩༢]རྙིང་དམ་ཆོས་མཐའ་དག་ལ། །ཐོས་བསམ་སྒོམ་པས་འཁྲུལ་མེད་ཐུགས་སུ་ཆུད། །རྩོད་དུས་ཀུན་མཁྱེན་གཉིས་པར་གསོལ་བ་འདེབས། །ཞེས་བྱུང་ལ། ཙ་རི་རྡོར་འཛིན་པ་ཆོས་ཀྱི་མགོན་པོའམ་མཐུ་མཁན་རྒྱ་བོར་གྲགས་པ་ལ་ཆོས་སྐྱོང་གི་སྐོར་གསན་པ་ཁོ་རང་གི་རྣམ་ཐར་དུ་འདུག་པ་དང་ཐམས་ཅད་མཁྱེན་པ་བསོད་ནམས་རྒྱ་མཚོར་ཆོས་འབྲེལ་གསན་པ་གཉིས་གསོལ་འདེབས་སུ་འཚེམས་པ་ཞིག་ཡིན་པར་མངོན།
བླ་མར་རློམ་པ་ལ་ལ་དག་ནི་རིགས་རུས་སྐྱེ་བརྒྱུད་སྟོབས་འབྱོར་གོས་སོགས་ཀྱི་ཁེངས་པས་ཆོས་འཚོལ་བ་ལ་བག་ཚ་བའི་གནས་སུ་བྱེད་ཅིང་ཅུང་ཟད་དོན་དུ་གཉེར་བའང༌། སྡོམ་གསུམ་ལས། རྟ་དང་ནོར་བུ་ལ་སོགས་པ། །ཅུང་ཟད་ཙམ་གྱི་ཉོ་ཚོང་ལ། །ཀུན་ལ་འདྲི་ཞིང་བརྟགས་ནས་སྤྱོད། །ཚེ་འདིའི་བྱ་བ་ཅུང་ཟད་ལའང༌། །དེ་འདྲའི་འབད་པ་བྱེད་པ་མཐོང༌། །སྐྱེ་བ་གཏན་གྱི་ལེགས་ཉེས་ནི། །དམ་པའི་ཆོས་ལ་རག་ལས་ཀྱང༌། །ཆོས་འདི་ཁྱི་ཡི་ཟས་བཞིན་དུ། །བཟང་ངན་གང་དུའང་མི་དཔྱོད་པར། །གང་ཕྲད་དེ་ལ་གུས་པར་འཛིན། །ཉིན་གཅིག་གི་ནི་སྐྱེལ་མ་འམ། །ཚེ་གཅིག་གི་ནི་གཉེན་འབྲེལ་ལའང༌། །འབད་དེ་བརྟགས་ནས་ལེན་པ་མཐོང༌། །དེང་ནས་བརྩམས་ཏེ་རྫོགས་པ་ཡི། །སངས་རྒྱས་མ་ཐོབ་བར་གྱི་དོན། །བླ་མ་མཆོག་ལ་རག་ལས་མོད། །འོན་ཀྱང་རྟོགས་དཔྱོད་མི་བྱེད་པར། །ཚོང་འདུས་ངན་པའི་ཟོང་བཞིན་དུ། །སུ་ཕྲད་རྣམས་ལས་ལེན་པ་མཐོང༌། །ཀྱེ་མ་སྙིགས་མའི་དུས་འདི་མཚར། །ཞེས་ཆོས་ཁུངས་བཙུན་མི་བཙུན་སོགས་ལ་མི་བལྟ་བར་བླ་ཆེན་དུ་མིང་བཏགས་པ་ཞིག་འགངས་ཆེའོ་སྙམ་པའི་བླུན་དད་