[A:༤༦༢]ལུང་དང་རིགས་པས་ཚར་བཅད། ཁོ་བོ་བློ་གསལ་རྒྱ་མཚོ་ཉལ་ནས་བསྡད་དེ་འདི་ཤེས་ད་ཤོག །ཅེས་བཀའ་སྩལ་པ་ན་གངས་རིའི་རྩེ་མོར་སེང་གེ་འཇིགས་པ་མེད་པའི་ང་རོའི་སྐད་བསངས་བསྒྲགས་ཚེ་གཅན་གཟན་དང་རི་དྭགས་རྣམས་ཀྱི་སྙིང་འགས་པ་ལྟར་རྟོག་གེ་པ་རྒན་པོ་མངོན་པའི་ང་རྒྱལ་ཅན་རྣམས་ཀྱི་ཧམ་ཐུལ་ཡུལ་བུད་ནས་གདོང་པ་སྨད་དེ་ཞུམ་པའི་གནས་ལ་བཀོད། དགུང་ལོ་བཅུ་བདུན་པའི་དུས་ཀྱི་སྐབས་ཤིག་ཐོན་གྱི་ལྷ་རི་ཕྱུག་སྒོམ་བྱ་བར་དཔལ་ལྡན་འབྲས་སྤུངས་ཀྱི་གདན་ས་བརྒྱད་པ་མཁས་བཙུན་གྲུབ་པའི་དབང་ཕྱུག་ཐོན་པ་ཡོན་ཏན་རྒྱ་མཚོའི་དྲུང་དུ་བྱོན་པ་ན་སྐུ་འབྲུམ་གྱིས་བསྙུང་པ་མ་དགོངས་པར་ཆུ་གྲང་མང་དུ་བཞེས་ཤིང་ཁྲུས་མཛད་ཞལ་ཟོན་ཀྱང་མ་མཛད་པས་ཇེ་ཐུར་གྱུར་པའི་ཚེ་གླང་ཕུ་བའི་ནང་སོ་སྨན་པས་འབྲུམ་པ་ཡིན་ཚུལ་ཞུས་པ་ཁོ་དང་རྒྱུན་གྱི་ཕྱག་གཡོག་པ་ཚོས་འབྲུམ་པ་མ་ཐར་བས་སྐུ་འཁྲིས་སུ་ཡོང་མ་བཅུག་པར་སྨན་པ་གཞན་ཞིག་དང་ཐོན་པས་བསྐོས་པའི་ཕྱགས་ཕྱི་བ་གཉིས་ཀྱིས་སྙུང་གཡོག་བྱས། གྲང་ཁང་ཞིག་ཏུ་བཞུགས་པའི་དུས་སྤྱན་འབྱེད་འཛུམ་མི་ཤེས་ཤིང་གསུང་ཡང་འབྱོན་མི་ཐུབ་པའི་ཤིན་ཏུ་དུབ་པ་ན་ཆུ་གྲང་མོ་གསོལ་བའི་སྣང་བར་རེ་བྱུང་དུས་དངོས་སུ་སྐྱེམས་པའི་གདུང་བ་ཐམས་ཅད་སངས་འགྲོ་བ་དང༌། དགོངས་ཤིག་ལྷ་རྗེས་ཕྱག་རྩ་བལྟས་སྒོ་རྒྱབ་ཏུ་སོང་ནས་ཙོད་ཙོད་མང་པོ་བྱེད་ཀྱིན་འདུག་པས་ད་རང་དགའ་མོ་མི་ཡོང་བ་འདུག་འཕོ་བ་ཞིག་མཛད་དགོངས་སྐུ་ཆུང་ངུའི་དུས་ལྷ་ཁབ་གྲུབ་ཆེན་མ་བྱ་བ་ལ་ཞུས་པའི་མཁའ་སྤྱོད་ལྗང་གུའི་འཕོ་དམིགས་དེ་མཛད་པ་ན། ཐུགས་ཀར་ལག་པ་གྲང་མོ་ཞིག་བཀབ་ནས་ད་ལམ་