[A:༤༢༡]ཕྱོགས་ཀྱི་གནས་བརྟན་མང་པོས་སློབ་དཔོན་ཀླུ་སྒྲུབ་ཀྱིས་རབ་གནས་མཛད་པའི་སྒྲོལ་མ་ངོ་ཆེན་དུ་སྤྱན་དྲངས་ནས་གདན་འདྲེན་ལ་བྱུང་བར། བོད་ཀྱི་ཕོ་ཉ་བས་དཀོན་གཉེར་ཁ་ཆེ་བར་རྔན་པ་བྱིན་ཏེ་རྟེན་གཉིས་ཞལ་ཚུར་བསྒྱུར་ལོ་ཙཱ་བ་བྱོན་པ་ན་པཎ་ཆེན་གྱིས་གཞོན་ནུ་འདི་འདྲས་ལོ་ཙཱ་བ་ཨེ་ཡོང་མི་ཤེས་པས་སེམས་བསྐྱེད་དང་སྒྲུབ་ཐབས་འགའ་ཞིག་བྱིན་ནས་ཕྱིར་བཟློག་དགོངས་པ་ལ་ཛ་ཡ་ཤྲཱིས་བསླབས་ནས་ལོ་ཙཱ་བས་པཎ་ཆུང་དགུ་ལ་དྲི་བ་མི་འདྲ་བ་གཉིས་གཉིས་དྲིས་པས་ཕྱི་དྲོ་ནས་ནམ་ཕྱེད་ཀྱི་བར་དུ་སོང༌། ཆོས་རྗེའི་ཐུགས་དམ་ནར་མ་མང་པོ་ཆག་ཀྱང་ཐུགས་དགྱེས་ཏེ་བོད་ན་འདི་འདྲ་བའི་ཆོས་སྨྲ་བ་འོང་བ་ངོ་མཚར་ཆེ་གསུངས། རིམ་གྱིས་ཕག་རིར་ཕེབས་ཕྱོགས་འདུས་ཀྱི་སྐྱ་སེར་གྲངས་མེད་པ་ལ་མན་ངག་ཁ་འཐོར་མང་དུ་གསུངས་ཚོང་འདུས་ནས་ཆུ་མིག་གི་བར་དུ་དགེ་འདུན་ཤིན་ཏུ་མང་པོས་བསྐོར་བས་ཁྱིམ་པ་རྣམས་ཀྱིས་ཞལ་ཡང་ལྟ་དཀའ་བར་གྱུར། ཁྲོ་ཕུར་དབྱར་གནས་མཛད་པའི་ཚུལ་ཤིང་ལེན་མི་བརྒྱད་བརྒྱ་ལྷག་ཙམ་བྱུང༌། བརྒྱད་སྟོང་པ་དང་སོ་ཐར་གྱི་ལུང་མང་དུ་གསུངས། རྟག་ཏུ་ངུའི་ལེའུ་ལ་བབས་པའི་ཚེ་མཆོད་པའི་མཎྜལ་རི་མོ་ཅན་གྱི་སྟེང་དུ་པོ་ཏི་བཞུགས་པ་ལ་མཆོད་པ་མང་པོ་བྱེད་བཞིན་པར་ནུབ་ཕྱོགས་ལ་སོང་བས་རྒས་ཁར་ཁ་ཆེར་འགྲོ་བར་འདུག་གསུངས། སྣར་གྱི་གླས་མོ་ཆེར་བྱོན་ཉིས་འགྲོལ་དུ་གསུངས་པ་ལ་དེ་བཞིན་ཉིད་ཀྱི་ལེའུ་ལ་སླེབས་པའི་ཚེ་ཆོས་རྗེའི་ཕྱག་དཔེ་བརྒྱད་སྟོང་པའི་པོ་ཏི་སྒྲོལ་མའི་པང་དུ་བྱས་དེར་མཆོད་པ་མང་པོ་བྱས་ནས་ཤར་ཕྱོགས་སུ་སོང་བས་དབུས་སུ་འགྲོ་དགོས་པ་འདུག་གསུངས་ཤིང་