[A:༦༣༤]པའི་བདག་པོ་རྣམས་ཀྱིས་སྒྲུབ་མཆོད་དུས་དྲན་གྱི་ཐེབས་སོགས་གནས་དགོན་མང་པོར་བསོད་ནམས་རྒྱ་མཚོའི་རླབས་ཕྲེང་དུས་ལས་ཡོལ་བ་མེད་པར་གྱུར་ཏོ། །མཐའ་ཡས་ཞིང་དུ་གྲངས་མེད་རྫོགས་སངས་རྒྱས། །འགྲོ་འདྲེན་ངལ་ཁུར་བཟུང་བཞིན་གངས་ལྗོངས་འདིའི། །གཉེན་གཅིག་བསུ་མར་འོངས་པའི་ཌཱ་ཀའི་ཚོགས། །ཕྱོགས་འདི་ཁོ་ནར་བརྩེ་བྲལ་ཀྱེ་མ་ཧུད། །སེམས་ཅན་ཀུན་དོན་རིང་ནས་ཐུགས་བསྐྱེད་མགོན། །རྩོད་ལྡན་དུཿཁས་ཆེས་མནར་གདུལ་དཀའ་རྣམས། །བོར་ནས་ཆོས་དབྱིངས་བདེ་བའི་ཀློང་གཟིམས་ན། །ཞལ་འཆེས་རྡོ་བའི་རི་མོ་མིང་དུ་ཟད། །འོག་མིན་ཞིང་དུ་ཡེ་ཤེས་ཐེམ་སྐས་ལ། །བཤེས་གཉེན་མཆོག་དེ་འབྱོན་པར་གསོལ་བཏབ་ནས། །དབང་གཞུའི་གུར་ཁྱིམ་མནྡ་ར་བའི་ཆར། །ཐབས་ཀྱིས་སྐལ་དམན་འགྲོ་རྣམས་འབྲིང་འདི་ཅི། །ཚུར་མཐོང་སྐྱེ་བོ་མྱ་ངན་ཁང་བུ་རུ། །བརྒྱལ་མོད་གནས་ལུགས་རང་ངོ་ཤེས་པ་རྣམས། །སེམས་ཉིད་དག་པའི་ངོ་བོ་ཚར་པ་རྗེ། །ཁྱབ་བདག་རྡོ་རྗེ་སེམས་གཞན་དམིགས་སུ་མེད། །འོན་ཏེ་ཆོས་ཀྱི་རྒྱལ་ཚབ་གནས་གསར་བས། །ཉེར་མཚོན་བསྟན་འཛིན་དཔྱིད་ཀྱི་གསེར་ལྡན་མ། །རྔུལ་ཆུའི་རྒྱུན་འབབ་དེ་བཞིན་སྙན་བརྒྱུད་ཆོས། །སྲིད་མཐར་མི་ནུབ་འཕེལ་དེར་སྤྲོ་དགའ་བརྟས། །དེ་ལྟར་རིགས་དང་དཀྱིལ་འཁོར་ཀུན་གྱི་ཁྱབ་བདག་སྙན་བརྒྱུད་རྒྱ་མཚོའི་དེད་དཔོན་ཚར་ཆེན་ཆོས་ཀྱི་རྒྱལ་པོའི་རྣམ་ཐར་གསོལ་འདེབས་ས་སྐྱོང་འདར་པ་རིན་ཆེན་དཔལ་བཟང་གིས་མཛད་པའི་བྱིན་རླབས་བདུད་རྩིའི་ཆུ་གཏེར་རྒོད་པ་དང༌། དེའི་འགྲེལ་པ་སྙན་ངག་མཁན་འདར་པ་བསོད་ནམས་ལྷུན་གྲུབ་ཀྱིས་བསྒྲིགས་པ་ལེགས་བཤད་ཟླ་བའི་སྣང་བ། རྩ་འགྲེལ་དེ་གཉིས་ལ་གཞི་བཅོལ་ནས་ཆོས་འཁོར་ཡང་རྩེ་དང་མཉན་ཡོད་བྱ་གཤོང་གི་མཁན་པོ་འཇམ་དབྱངས་དགའ་བའི་བཤེས་གཉེན་གྱིས་མཛད་པའི་