[A:༥༩༨]གྱིས་ཕན་དུ་རེ་བའི་རིགས་མ་ཡིན་པར་དུས་དགྲའི་དབང་པོ་མ་ཧེའི་ཞལ་ཅན་གྱི་བསྐྱེད་རིམ་ལ་བརྟན་པ་ཐོབ། རྫོགས་རིམ་ཀློང་དུ་གྱུར། བསྙེན་སྒྲུབ་ཕ་མཐར་སོན་པས་འཇིགས་པ་དང་བྲལ་ནའང་གསང་སྔགས་ཕྱག་ལེན་གྱི་ཆེ་བ་མི་ནུབ་པའི་སླད་དུ་བདུན་གཉིས་ཀྱི་བར་ལྗགས་བསྙེན་ཁ་གསོ་མཛད་པའི་ཚེ་འོད་གསལ་དུ་འཆི་བདག་ཡབ་ཡུམ་ལ་གཤིན་རྗེ་ཕོ་བརྒྱད་མོ་བརྒྱད། ལྷ་སྲིན་དྲེགས་པའི་ཚོགས་ཀྱིས་བསྐོར་ནས་ཞ་ལུའི་རྡོ་གཅལ་དུ་སྟང་སྟབས་བྱེད་པ་ཤར། སྤྱི་སྒོས་སོ་སོ་ནས་གྲ་སྒྲིག་དགོས་པའི་རིགས་སྔར་སྲོལ་འཕྱུགས་མེད་ཡོང་བའི་ཞལ་ཏ་གནང༌། དུས་དེར་སྒོ་ཡིག་གནང་པ་འདི་ལྟ་སྟེ། ཤྲཱི་མངྒུ་རུ་བཛྲ་བྷཻ་ར་ཝཱ་ཡ་ན་མཿ རྒྱལ་བ་ཁྱབ་བདག་རྡོ་རྗེ་འཆང་ཆེན་པོ་ཉིད་ནས་བཟུང་བུ་སྟོན་ཐམས་ཅད་མཁྱེན་པ་ཡབ་སྲས་ཀྱིས་གཙོ་མཛད་བདག་གི་བླ་མ་རྗེ་བཙུན་གཉིས་སྤངས་ཞབས་ཀྱི་བར་དུ་བྱོན་པའི་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ། ཁྲོ་བོའི་དབང་པོ་དཔལ་གཤིན་རྗེའི་གཤེད་ཀྱི་ལུང༌། དཔལ་ཞ་ལུ་གསེར་བཀང་གི་གདན་ས་བཅུ་གསུམ་པ་ཤཱཀྱའི་དགེ་སློང་རྡོ་རྗེ་འཛིན་པ་དཔལ་དུས་དགྲ་ནག་པོ་མ་ཧེའི་ཞལ་གྱི་བརྟུལ་ཞུགས་གྲུབ་པའི་ཡི་གེ །སྲིད་པ་གསུམ་ན་གནས་ཤིང་རྒྱུ་བའི་འབྱུང་པོ་མི་དང་མི་མ་ཡིན་པ་རྣམས་ལ་ཟློ་བ། ཟླ་བ་འདིའི་ཉེར་གསུམ་གྱི་ཉིན་ལྷོ་ཕྱོགས་རིམ་པ་བདུན་གྱི་ས་འོག་འཇིགས་རུང་གཤིན་རྗེའི་གྲོང་ཁྱེར་ཆེན་པོ་ནས་དཔལ་གཤིན་རྗེའི་གཤེད་ཀྱི་བཀའ་སྡོད་ཆེན་པོ་འཆི་བདག་ལས་ཀྱི་གཤིན་རྗེ་ཡབ་ཡུམ་དང་འཁོར་ལས་ཀྱི་མ་གཤིན་ཕོ་མོ་སྣང་སྲིད་ལྷ་སྲིན་སྡེ་བརྒྱད་དང་བཅས་པ་སྤྱན་དྲངས། མཆོད་པ་དང་གཏོར་