[A:༥༨༤]ཞིང་མར་གྲགས་པའི་ཨྱོན་རིན་པོ་ཆེའི་གསོལ་འདེབས་ཚིག་དོན་ཕུན་སུམ་ཚོགས་པ་དེ་ཡང་མཛད། མྱུག་རྒྱལ་ཁང་དུ་ཞག་ལྔ་ཙམ་བཞུགས་ནས་འདར་དུ་ཕེབས། རྣམ་རྒྱལ་ཆོས་རྫོང་དུ་མགོན་ཁང་གསར་དུ་མཛད་ནས་རྡོ་རྗེ་ནག་པོ་ཆེན་པོ་གུར་གྱི་མགོན་པོའི་སྐུ་བྱིས་པ་ལོ་བཅུ་དྲུག་འགྲོ་བའི་ཚད། ཡུམ་ཆེན། ལྷ་མོ། ཞལ་བྲམ་གཟུགས་གསུམ་ཁྲུ་ཕྱེད་དོ། །རྟག་གཏོར་མགོན་པོ་ཆེ་ཆུང་ལས་མཁན་བཅས་མཚན་ཉིད་དང་ལྡན་པའི་འཛིན་གཏོར་སྤྱན་གཟིགས། ཐོག་ཏུ་མན་ངག་ལས་བྱུང་བའི་རུ་མཚོན་བཙུགས། སྐུ་བརྙན་རྣམས་དམ་པའི་ཤོག་དྲིལ་ཞལ་ཤེས་མས་བརྒྱན་པའི་རབ་གནས་ཞག་བདུན་མས་འོག་མིན་གྱི་གནས་ནས་མགོན་པོ་དངོས་སུ་བྱོན་པའི་གཟི་བྱིན་གྱི་འཕྲིན་ལས་རྣམ་བཞི་ཐོགས་པ་མེད་པར་སྒྲུབ་པའི་སྐུ་རྣམས་དུས་ཕྱིས་སྡེ་སྲིད་གཙང་པས་རྫོང་བཤིགས་ནས་གཞིས་ཀར་སྤོས། དེ་ནས་ཀྱང་འཕོས་ཏེ་དེང་སང་ས་སྐྱའི་ཁྱད་འཕགས་མགོན་ཁང་དུ་བཞུགས་པར་སྣང༌། རྔ་ཡབ་གླིང་གི་མགོན་སོགས་འདྲེན་པ་དང༌། །ཡི་དམ་སྲུང་མའི་ཟློས་གར་གང་ཐུགས་ཤེལ། །དག་པའི་ཚོན་རིས་དབང་གཞུ་ལྟར་བཀྲ་བ། །བུར་ཤིང་དངར་བའི་རོ་བཞིན་དབྱེ་ནུས་མིན། །སྐྱེ་མང་རྗེས་བཟུང་ཐུགས་སྲས་གནས་གསར་བར། །གཉིས་སྤངས་བླ་མའི་གདམས་པ་ཡོངས་གཏོད་པའི། །རྟེན་འབྲེལ་ཞིང་སྐྱོང་དབང་པོས་ཏེ་སེ་ནས། །དམར་ཟླུམ་སྤྱན་གྱིས་གཟིགས་ཏེ་ཉེ་བར་བསྒྲིགས། །གཡང་སར་འཇིགས་བྲལ་བརྟུལ་ཞུགས་གཤོག་རླབས་ཀྱིས། །བརྒྱ་ཕྲག་ཆོ་འཕྲུལ་བསྟན་ཚེ་གོས་སེར་མིག །མཁའ་ལྡིང་ཞོན་པའི་ཁེངས་པ་ཡོངས་བོར་ནས། །རུས་སྦལ་གཟུགས་ཀྱིས་ས་ཆེན་