[A:༥༦༩]པ་གཤེགས་པའི་ཐུགས་ངལ་ཀྱང་སངས་པ་ལྟ་བུའི་ངལ་གསོས། ཞབས་དྲུང་རིག་འཛིན་ཆེན་པོ་དང་རྗེ་མཁྱེན་བརྩེ་ལྷན་དུ་དཀར་བདུད་ལྕམ་དྲལ་གྱི་རྗེས་གནང་སྩལ་ནས་གྲང་མོ་ཆེར་ཕེབས་ཏེ་སྐོར་ཅིག་བཞུགས་ནས་རྨུ་གཤོང་དུ་སྟན་ཆགས་པའི་དུས་སྔར་སྐྱེད་ཚལ་དུ་ཆོས་འབྲེལ་གསན་པ་དང༌། ཕྲ་མ་ནས་ཀྱིས་རིན་སྤུངས་སུ་སྙན་ཕྲ་ཕུལ་བའི་རྐྱེན་གྱིས་བོད་མཁར་ནས་ཚང་མིང་གི་ལྷག་མར་གྱུར་པའི་རྐྱེན་ངན་གྲོགས་ཤར་ལྟ་བུས་བསྐུལ་ཏེ་རྗེ་བཙུན་བོད་མཁར་བ་མཻ་ཏྲི་བྱམས་པ་དོན་གྲུབ་རྒྱལ་མཚན་དཔལ་བཟང་པོས་ཞབས་པད་བསྙེན་པར་ཕེབས། ཟང་ཟིང་གི་དངོས་པོ་ཡོད་དགུ་ལྟ་བུ་འཁོར་གསུམ་ཡོངས་དག་གི་འབུལ་བ་རྒྱ་ཆེར་མཛད། ཞལ་གྱི་བདུད་རྩི་རྫོགས་པར་མྱངས་རྗེས་བསྟན་པ་སྤེལ་བ་དང་སྒོམ་སྒྲུབ་རྩེ་གཅིག་ཏུ་མཛད་དགོངས་པས་སྐུ་ལ་བཅར་ནས་བཞུགས། མ་ཆེན་རྡོར་བཀྲས་པ་ཕྱོགས་འབྱོན་དང་ཐུག་པའི་རེ་ཞིག་གཉེར་གྱིས་གསུང་པ་བཞིན་མཛད་པའི་ཚེ་དེ་སྔ་གོང་ནས་གསོལ་ཇ་ཅུང་ཟད་དཀོན་པ་ཡོད་པར་མི་ཉག་དཔོན་པོ་མགོན་པོ་འོད་ཟེར་གྱིས་གསོལ་ཇ་ཕོན་ཤིན་ཏུ་ཆེ་བའི་འབུལ་སྐྱེལ་སླེབས་པས་རྗེ་དྲུང་གི་གཉེར་ཁ་འཕྲོད་ཅེས་ཐུགས་དགྱེས། རིན་པོ་ཆེ་བོད་མཁར་བ་གཙོ་བོར་གྱུར་པའི་དོན་གཉེར་ཅན་འགའ་ལ་གསུང་ངག་རིན་པོ་ཆེ་སློབ་བཤད་ཀྱི་སྣང་གསུམ་ནས་བཟུང་དབང་བཞི་པའི་བར་གྱི་ཉམས་འཁྲིད་ཟླ་བརྒྱད་ལྷག་ཙམ་སྨིན་རྒྱས་དེའི་ཆ་ལག་ཏུ་དགོས་པའི་དབང་བྱིན་རླབས་ལུང་མན་ངག །དཔལ་རྡོ་རྗེ་འཇིགས་བྱེད་རྭ་ལུགས་ཀྱི་དབང་བཞི་མཁའ་འགྲོ་སྙན་བརྒྱུད། རྣལ་འབྱོར་བཞི། རྣམ་པར་འབྱེད་པ། རྭ་རྩེ་སེམས་འཛིན། མཚན་མ་གྱེན་སྒྲེང༌།