[A:༥༣༤]ཉེན་གདའོ་གསུང་བ་ཡོད་ཅིང༌། འདི་སྐོར་གྱི་གཏམ་མང་པོ་ཞིག་ཡོད་དེ། སྣོད་མི་འདུག་པས་ནམ་མཁའི་དབྱིངས་སུ་ཕཊ། །སྤྲང་རྒྱལ་ཁམས་ཕྱོགས་མེད་རྒྱུ་བའི་ཚེ། །ཡུལ་ཡ་མཚན་གྱི་ལྟད་མོ་འདི་ལྟར་མཐོང༌། །ཤ་བ་དགེ་སྡིངས་རྡོ་རྗེའི་ཕོ་བྲང་ན། །རྗེ་ས་སྐྱ་ལོ་ཙཱའི་སྐུ་ཡི་དབོན། །ཐུགས་གཅིག་ཏུ་འདྲེས་པ་སྲས་ཀྱི་མཆོག །ཁོང་འཇམ་དབྱངས་གཞོན་ནུ་དངོས་དང་མཇལ། །གསུང་བག་ཕེབས་ཀྱི་བདུད་རྩི་སྙིང་ལ་སིམ། །ཆོས་ཟབ་ལམ་གྱི་རྣལ་འབྱོར་བཀའ་དྲིན་ཞུས། །ཁོང་སྐྱོན་བྲལ་གྱི་མཛད་འཕྲིན་མཐོང་བའི་ཚེ། །ངེད་ས་སྐྱ་པའི་མདུན་མ་གྲུབ་འདུག་སྙམ། །སེམས་དགའ་སྤྲོ་ངང་དད་པས་མཆི་མ་འཁྲུག །ཞབས་སྤྱི་གཙུག་ཏུ་བླངས་ནས་སྨོན་ལམ་བཏབ། །དེར་ཤབ་སྟོད་ཀྱི་ཆུ་ཀླུང་བརྒལ་ནས་ཕྱིན། །ཡུལ་ཡ་མཚན་ཅན་ཁྲོ་ཕུའི་གཙུག་ལག་སླེབ། ལྷ་བྱམས་མགོན་གྱི་སྐུ་བརྙན་ཞལ་བཟང་མཐོང༌། །རྟེན་ཁྱད་པར་ཅན་ཀུན་ལ་བྱིན་རླབས་ཞུས། །མ་མི་མིན་མཁའ་འགྲོས་འཇིགས་གཟུགས་བསྟན། །ང་ཁྲོ་རྒྱལ་གྱི་ང་རྒྱལ་དབྱིངས་ནས་རྒྱས། །མཚོན་འཕྲེང་ལྕག་གི་འདེད་དྲག་བཏང་བའི་ཚེ། །ཁོང་ལུང་བསྟན་གྱི་སྒྲ་དབྱངས་སྒྲོག་པ་སྐད། །ཁྱོད་ཡེ་ཤེས་ཀྱི་ཌཱ་ཀིའི་ལུང་བསྟན་དང༌། །མོ་ཤ་ཟན་གྱི་མཁའ་འགྲོའི་རྒྱང་འབོད་གཉིས། །ང་རྣལ་འབྱོར་གྱི་སེམས་ལ་བདེ་སྡུག་མེད། །གང་ཡིན་ཀྱང་རང་ངོ་དབྱིངས་སུ་སྙམ། །ཨ་ལ་ལ་རྒྱལ་ཁམས་བསྐོར་བའི་ཚེ། །སྔོན་མེན་ཀྱི་ལྟད་མོ་ཨ་རེ་འཇིགས། །སེམས་ཉིད་ཀྱི་རང་གདངས་ཡིན་པར་གོ །དྲིན་ཅན་གྱི་བླ་མ་དེ་སྐུ་དྲིན་ཆེ། །དཔལ་མཁའ་སྤྱོད་ཀྱི་དགའ་མ་ཡིད་འོང་མ། །དུས་རིང་ནས་བསྐྱངས་པའི་མ་མ་དེས། །ད་རིག་འཛིན་གྱི་གྲུབ་པ་སྟེར་བའི་