[A:༤༡༤]མཐའ་ཡས་པ་ལ་དབང་འབྱོར་པའི་བདག་ཉིད་གྲུབ་ཆེན་བུདྡྷ་ཤྲཱི་ཞེས་གྲགས་པ་འདིའི་ཡབ་ཏི་ཤྲཱི་ཀུན་དགའ་རྒྱལ་མཚན་གྱི་ཞབས་འབྲིང་བ་ཆེན་པོ་གུ་ཤྲཱི་དཔལ་འབྱོར་ལེགས་པ་ཞེས་བྱ་བ། ཧོར་ཡུལ་དུ་དཔལ་དུས་ཀྱི་འཁོར་ལོའི་རྒྱུད་འགྲེལ་གྱི་པར་མཛད་པ་པོ་དེ་དང༌། ཡུམ་སྒྲོལ་མ་འབུམ་གཉིས་ཀྱི་སྲས་སུ་ས་མོ་ཡོས་ཀྱི་ལོ་ལ། ལ་སྟོད་བྱང་གི་ས་ཕྱོགས་མདོག་གི་དགོན་པ་སྒོ་ཕུ་ཞེས་བྱ་བར་སྐུ་འཁྲུངས། ཆུང་ངུ་ནས་བླ་མ་ཤཱཀྱ་བཟང་པོ་ལས་དགེ་བསྙེན་ཞུས། ཚེ་དཔག་མེད་ཀྱི་དབང་ནོད་དེ་མཚན་སངས་རྒྱས་དཔལ་དུ་བཏགས། སྤྱོད་འཇུག་ལ་ཁ་དོན་བྱེད་པའི་མ་མ་ཅིག་དང་ལྷན་ཅིག་ཏུ་བཞུགས་པས་གཞུང་ཐུགས་སུ་ཆུད། ཀློག་དང་ཡི་གེ་ལ་སོགས་པ་སྦྱངས་ནས་དགེ་བསྙེན་གྱི་རྟེན་དེ་ཉིད་ལ་སྒོ་ཕུར་བཤད་གསར་མཛད། རང་གི་ཞང་པོ་སློབ་དཔོན་དྷྭ་ཛ་ཤྲཱི་ལ་བརྟག་པ་གཉིས་པའི་རྒྱུད་དང༌། ཀྱེ་རྡོ་རྡོའི་ལག་ལེན་ལ་སོགས་པ་སློབ་གཉེར་མང་དུ་མཛད། དགུང་ལོ་ཉི་ཤུ་རྩ་གསུམ་ལ་གནས་ལྔ་རིག་པའི་པཎྜི་ཏ་ཆེན་པོ་ཆོས་རྗེ་ས་བཟང་པས་མཁན་པོ་དང༌། མཁས་ཤིང་གྲུབ་པ་བརྙེས་པ་ལོ་ཙཱ་བ་ཆེན་པོ་བྱང་ཆུབ་རྩེ་མོས་ལས་ཀྱི་སློབ་དཔོན་དང༌། སྡེ་སྣོད་འཛིན་པ་མཁན་ཆེན་སངས་རྒྱས་བཟང་པོས་གསང་སྟེ་སྟོན་པའི་སློབ་དཔོན་མཛད་ནས་དཔལ་བཟང་ལྡན་གྱི་གཙུག་ལག་ཁང་དུ་རབ་ཏུ་བྱུང་བ་དང་བསྙེན་པར་རྫོགས་པ་དུས་གཅིག་ཏུ་མཛད་དེ། སྔར་གྱི་མཚན་སཾ་སྐྲྀ་ཏར་བསྒྱུར་ནས་བུདྡྷ་ཤྲཱི་ཞེས་པར་བཏགས་སོ། །རབ་ཏུ་བྱུང་བའི་དགའ་སྟོན་དང་ཡབ་རྒྱ་ཡུལ་དུ་གཤེགས་པའི་ཚོགས་བསོག་རྒྱ་ཆེན་པོ་མཛད་དོ། །དེ་ནས་མཁན་ཆེན་ཤེས་རབ་རྒྱ་མཚོ་བ་ལས་ཕར་ཕྱིན་དང་མངོན་པ་ཀུན་ལས་བཏུས་ལ་སློབ་གཉེར་མཛད་ཅིང་སྔ་ཕྱིར་ཆོས་མང་དུ་གསན། མཁན་ཆེན་མགོན་རྒྱལ་བ་ལས་རྣམ་འགྲེལ་གྱི་སློབ་གཉེར་ཅུང་ཟད་མཛད་ཅིང་སྔ་ཕྱིར་ཆོས་དུ་མ་གསན། དཔལ་ལྡན་ས་སྐྱར་རྟོག་གེ་པ་དཔལ་ལྡན་བཟང་པོ་ཤངས་པ་བློ་མཆོག་ཏུ་གྲགས་པ་ལ་རྣམ་འགྲེལ་གྱི་སློབ་གཉེར་མཛད་པ་ཉི་ཐོག་གི་ལས་ཚབ་དང་འཆད་ཉན་ལ་སོགས་པ་དགུང་ལོ་སུམ་ཅུ་སོ་གཅིག་གི་བར་དུ་