[A:264b]mthong bar grags shing / de nas chos skyong chen po snang dus kyi nyin min pa byon ma byung ba na/ sngags 'chang nyid kyis chos skyong la khyed kha rtsang mi yong ba ci yin gsungs pa la/ chos skyong gis sa skya pa chen po de bden/ gdug 'dres byang shambha lar phyin pas khrag cig la chags nas ma slebs pa yin zhus pas/ sngags 'chang nyid thugs 'khrugs pa'i tshul gyis/ khyed slob dpon padma 'byung gnas kyis li yul lcang ra smug po nas bkug spyir bod kyi gtsug lag khang dang mchod rten bre tsam yan gyi gnyer gtad/ khyad par bsam yas kyi gtsug lag khang dang / sde bstan pa srung bar bka' bsgos pa ltar khas blangs nas/ byang shambha la ru thal ba 'gam du phyin pa yin nam zhes gsungs pa na/ chos skyong chen po rang yang zhum pa dang bcas bdag nyid chen po'i bka' nyan cing 'dug par grags shing / de nas bdag nyid chen po'i lcog gsar rnying gnyis dang / slob dpon gyi phyag bzo sku 'bras chen mo la yang nyams gso mdzad de/ rab gnas dang bkra shis sogs rgyas par gnang nas/ dpal bsam yas mi 'gyur lhun gyis grub pa'i gtsug lag khang na gnas pa'i lha mi thams cad yi rang bar mdzad de bstan pa rin po ches cher gsal bar gyur ces yongs su grags pa yin no/
/de nas bdag nyid chen pos gtsang phyogs su chibs kyi kha lo bsgyur nas rim gyis gdan sa chen por phebs pa na/ gdung sras 'jam pa'i dbyangs sku mched sogs kyis thog drangs gzhir bzhugs kyi dge ba'i bshes gnyen mang po dang / phyogs nas byon pa'i dge ba'i bshes gnyen