[A:235a]bzung ba'i mtshan ma yang bsam gyis mi khyab pa mnga' ba yin te/ de yang bdag nyid chen po 'dis dgung lo nyi shu rtsa grangs bzhes pa'i skabs shig rtse gdong gi dgon gzhis mdo chos gzim khang du sku mtshams mdzad nas rdo rje phur pa gtso bor gyur pa'i thugs dam gnang dus/ sa bir zhal sprod/ bcom ldan 'das rdo rje gzhon nu/ dpal ldan bla ma dam pa bsod nams rgyal mtshan rnams kyi zhal gzigs pa dang / bdag nyid chen po 'di dgung lo sum cu so gnyis su phebs pa me pho byi ba'i lo nA lendrar gsung ngag rin po che lam 'bras bu dang bcas pas thog drangs/ khrid/ lung / man ngag dbang byin rlabs rjes gnang sogs zab rgyas kyi dam pa'i chos mang po stsal ba na/ de'i skabs su rje sangs rgyas rin chen yang phebs te de nas yab sras lhan cig tu gtsang phyogs la gdan bteg ste/ yar lam srin po ri mjal bar phebs pas bde mchog gi sku de bde mchog zhal bzhi phyag bcu gnyis par gzigs nas sku lus la 'phar g.yo la sogs pa byung ste/ gar stabs sna tshogs mdzad cing / de nas de las sangs pa na khye'u dkar po gcig gis bsu ba byas nas bskor lam la phebs pas/ de'i dus su rje sangs rgyas rin chen gyis 'khor rnams la/ khong pa la gzigs snang dang nyams rtogs mang po 'khrungs gda'/ mi tsho bde mchog sngon po yin zer te 'di ni dkar por 'dug gsung ba la sogs pa dang / yang lan cig mus kyi bsam gtan phug tu lo gcig hril po sku mtshams la bzhugs te/ 'khor lo bde mchog gi gsung