[A:232b]gsum dang / /so thar byang sems sdom pa bslab byar bcas/ /sgra dang snyan ngag sdeb sbyor skar rtsis dang / /bka' dang bstan bcos glegs bam rab 'byams kyi/ /dag gsal lung gi bka' drin dang bcas pa/ /mtha' yas gdul bya'i bsam pa ji lta bar/ /stsol mdzad chos kyi sbyin bdag che ba po/ /mkhas pa'i mdun sar 'gal 'brel gtam byed tshe/ /lung rigs rjes su gdams pa'i mche sder gyis/ /ma rtogs log rtog the tshom glang po'i lus/ /'joms mdzad smra ba'i seng ge mtshungs pa med/ /legs sbyar tshig gi srad bu la brgyus pa'i/ /rgyan dang mngon brjod sdeb sbyor nor bu'i phreng / /mkhas pa'i yid 'phrog dbyangs can mgul pa'i rgyan/ /spel mkhas tshig rje tshig bdag smra mkhas po/ /zhes gsungs pa ltar ro/ /de bas na bdag nyid chen po 'dis mkhas pa'i bya ba rnam pa gsum gyi sgo nas mkhyen brtse nus gsum gyis rgyal ba'i bstan pa nyin mo ltar gsal bar mdzad pa'i snyan grags phyogs kun tu khyab pa la brten/ skal ba dang ldan pa'i gdul bya rnams ma bsdus par yang rang gi ngang gis 'du zhing / khyad par gsung gi bdud rtsi ngoms par gsol ba dang / chos kyi 'brel pa ci rigs pa thob pa'i bstan 'dzin gyi slob ma yang / bstan pa'i mnga' bdag dam par bzhugs pa rje rang nyid kyi sku'i gcung 'jam pa'i dbyangs ngag gi dbang phyug grags pa rgyal mtshan dpal bzang po sku mched rnams dang / snyigs dus bstan pa'i nyi ma sngags 'chang ngag gi dbang po kun dga' rin chen bkra shis grags pa rgyal mtshan dpal bzang po dang / bdag chen