[A:230a]lo'i dbang bskur sa lugs dang / /jo zha lugs kyi sbyor drug la sogs zhus/ /ka la tsandra rin chen 'byung gnas dang / /sna tshogs gsal ba snyan ngag me long dang / /dpag bsam 'khri shing la sogs tha snyad kyi/ /gtsug lag phal cher zhus shing nan tan bgyis/ /rang bzhin rkyen dang rnam 'gyur la sogs pa/ /dus dang don la 'jug tshul cung zad shes/ /saM skr-i ta dang bod kyi klog tshul la/ /snga rabs 'chad tshul rab tu mang na yang / /skyon med 'bri dang brjod pa'i tshul shes pa/ /mkhas pa'i gtsug rgyan 'di nyid bka' drin las/ /gzhan la 'chad dam rang nyid nyams su len/ /ji ltar byed kyang lag nom mi dgos tsam/ /zhes gsungs pa ltar dang / gzhan yang chag lo tsA ba rin chen chos kyi rgyal po'i drung du sgrol ma lha bcu bdun ma'i dbang / lus dkyil lha nyer lnga ma'i dbang / mgon po lha bcu gnyis ma dang / brgyad ma'i dbang la sogs pa zab cing dkon pa'i chos mang du gsan la/ de ltar mkhas shing grub pa'i sa brnyes pa'i bla ma'i tshogs du ma zhig las phyi nang gi chos tshul bsam gyis mi khyab pa zhig gsan cing thugs su chud par mdzad pas/ gzhan la 'chad pa dang rang nyid nyams su len pa sogs gang la yang thogs pa med pa'i blo gros mnga' ba zhig ste/ ji skad du/ sgra tshad bzo dang gso ba nang don rig /sdeb sbyor mngon brjod zlos gar tshig gi rgyan/ /rtsis sogs mkhas pa rnams la yongs grags pa'i/ /rig gnas phal cher gzigs pa tsam gyis dgongs/ /khyad par nyi zla lta bu'i ka tsan gnyis/ /