[A:172a]zhes zer zhing the tshom du gyur pas cung zad yid mi bde zhing / la las yin par nges kyang gsal po smra mi nus par sems mya ngan gyis gzir la/ g.yas ru byang gi spyi mtsho skya mo'i mtsho sgo yang skya bo kha gdangs la zug pa dang / mang mkhar gyi lung pa na yod pa'i sku 'bum cig gi drung du ma Ni'i sgrub pa byas pa na/ mchod rten gyi ba thag la sha chen babs na 'khon gyi gdung brgyud rtsod med re 'grongs pa yin pa la/ mtsho sgo yang der zug cing sha chen yang babs pas gdung brgyud cig la ngan zhes kun gyis gleng ba cig byung zhing / ma Ni'i sgrub pa byas pas lung bstan 'byung ba'i sku 'bum ni ding sang brag shod ma Nir grags pa 'di'o/ /de nas zla ba lnga pa'i nyi shu skor na chos rje'i gsung las/ da rang tho rangs mkhan chen bu ston pa dang rdo rje rnal 'byor ma byon nas mkhan chen pa'i zhal nas/ 'di rang mkha' spyod yin no gsungs pa'i snang ba cig byung gsungs/ yang chen po dge slong pas gzigs snang cig rgyun du yod pa'i rnam pa cig gda' ba ci 'dra zhig gda' zhus pas/ chos rje pas phyag gi sor tshigs la tshod mdzad nas 'di tsam pa'i tshod kyi de bzhin gshegs pa'i sku gzugs kyis nam mkha' khengs 'dug gsungs pa la/ khong gis de rnams thugs dam gyi lha tshogs lags sam zhus pas/ chos rje'i zhal nas de min khong tsho kha sing nas byon tshar/ rang res blo khel na dkon mchog gis mi bslu ba nges par 'dug gsungs/ de nas lo tsA ba nam mkha' bzang pos gsol sman 'dra phul te/ chos rje'i drung na yod pa'i dus